In die de oe | Cojuios omosessuales, su Bèlgiu crompiat segundu

de Maurìtziu Sale

Deretos West. Url imàgine

Su Bèlgiu est  su segundu istadu in su mundu chi at aprovadu – reconnoschende·lu cun una lege – su cojuiu intre persones omosessuales. Sa lege est nàschida, comente fiat acontèssidu in Olanda - su primu paisu a las reconnòschere, in su 2000 -  cando su podere fiat in manos de  sos progressistas làicos. Fiat su 30 de ghennàrgiu de su 2003, duncas non sèculos a como, ma in tempus reghente. Pro unos cantos meses est abarradu in vigore su bedu pro sos omosessuales istràngios, posca cantzelladu cun una regulamentatzione noa, in vigore dae su 2004. Sas règulas noas previdint, sena leare in cunsideru su sessu de sos chi si cherent cojuare inie, chi nessi unu de sos duos interessados siat residente in Bèlgiu mìnimu  tres meses. Sas règulas noas cunsentint fintzas s’adotzione cungiunta de minores  siat chi siant fìgios naturales de unu de sos duos isposos, siat chi siant fìgios de ànima, leados duncas dae un’istitutu autorizadu. Unas cantas curiosidades:  a su 12 de trìulas, in su 2015 sas crobas omossessuales in Bèlgiu nche fiant cròmpidas a 1.968; dae sos datos resurtat chi siat Anversa, sa tzitade in ue b’at prus cojuios momosessuales; pro su chi pertocat imbetzes sos divòrtzios paret chi intre sas crobas lèsbicas de su 2013, su 7,4%  siat oe iscrobada o divortziada; sa proportzione pro sas crobas de sessu maschile est de su 4,7%.

Portugallu e Galles nche crompent a sa semifinale de su 6 de trìulas

de Màuru Piredda

Incarca subra de s'imàgine pro l'ismanniare

Su Portugallu e su Galles, binchende in sos cuartos contra a sa Polònia e a su Bèlgiu, nche crompent a sa prima semifinale de su campionadu europeu de fùbalu. S'àtera semifinale at a èssere intre sos chi ant a bìnchere sos disafios de oe (Germània – Itàlia) e de cras (Frantza – Islanda).

Frantza, Germània e Bèlgiu bolant a sos cuartos. Oe Itàlia-Ispagna e Inghilterra-Islanda

de Màuru Piredda

Incarca subra de s'imàgine pro l'ismanniare

  

Frantza, Germània e Bèlgiu bolant a sos cuartos a pustis de sas partidas de eris contra a s'Irlanda, a s'Islovàchia e a s'Ungheria. Sos frantzesos, vitoriosos gràtzias a duos gol de Griezmann (sos aversàrios fiant in vantàgiu dae su segundu mimutu cun Brady), ant a giogare su 3 de trìulas contra a sa chi at bìnchere su disafiu intre Inghilterra e Islanda. Boateng, Gomez e Draxler sunt imbetzes sos marcadores tedescos. Islovàchia pagu atzuda ma agigu malassortada: Özil s'at faddidu unu rigore. Chie at a giogare contra a sos panzer? Sos ispagnolos o sos italianos? Grandu proa de su Bèlgiu (aversàriu imbeniente de su Galles). Bator sos gol signados dae Alderweireld, Batshuayi, Hazard e Carrasco.

Grupu E, s'Irlanda vitoriosa contra a s'Itàlia conchistat sos otavos. Biaitos e dimònios rujos a 6 puntos

de Màuru Piredda

Incarca subra de s'imàgine pro l'ismanniare

Cun sas partidas de oe est concruida sa fase de cualificatzione chi at bidu 24 natzionales cunfrontende·si in 6 girones. Pro su chi pertocat su grupu E b'at àpidu duos 0-1. E ambas retes pagu prus o mancu a sos chimbe minutos dae su de 90. S'irlandesu Brady, cun sa conca, at signadu contra a s'Itàlia lassende su thiniscolesu Sirigu a manos iscutas. Sos pitzocos birdes si cualificant a sos otavos. Nainggolan imbetzes est su marcadore de su Bèlgiu contra a s'Isvètzia.

Grupu E, su Bèlgiu balàngiat tres puntos

de Màuru Piredda

Incarca subra de s'imàgine pro l'ismanniare

Sa natzionale belga at bìnchidu sa prima partida sua de sos europeos de Frantza. A pustis de sa derrota contra a s'Itàlia, sos 11 de Wilmots nch'ant tzacadu tres botzas in sa porta irlandesa. Sos gol de sos dimònios rujos in su segundu tempus. Marcadores Lukaku (a su de 48 minutos e a su de 70) e Witsel (a su de 61).

Grupu E. Parègiu intre Irlanda e Isvètzia. Vitòria italiana contra a su Bèlgiu

de Màuru Piredda

Incarca subra de s'imàgine pro l'ismanniare

A pustis de unu primu tempus sena perunu gol, s'Irlanda at mudadu s'andanta de sa partida a duos minutos dae su comintzu de su segundu. Gràtzias a unu tiru traessu de Coleman, dae manu dereta, Hoolahan nch'at insertadu sa botza in su cugione de sa porta amparada, finas a tando e cun profetu, dae Isaksson. A su de 69 minutos s'Isvètzia at paregiadu pro more de un'autogol de Clark. Giaccherini e Pellè, imbetzes, sunt sos marcadores italianos contra a su Bèlgiu. Cun custu resurtu sos biaitos ghiant sa classìfica de su girone.

Europeos 2016, sas iscuadras e sos disafios de su grupu E

de Màuru Piredda

Incarca subra de s'imàgine pro l'ismanniare

Su 13 de làmpadas ant a comintzare sas partidas de su Grupu E. A merie s'ant a disafiare sa Republica de Irlanda e s'Isvètzia. Sos pitzocos in birde ant pigadu parte a s'europeu petzi in su 1988 e in su 2012. Bator annos a como, ghiados dae s'italianu Giovanni Trapattoni, perdeint totu cantas sas partidas. Finamentas sos grogu-biaitos iscandìnavos non nche barigheint su girone marchende una vitòria ebbia (duas sas partidas pèrdidas). Su mègius resurtu isvedesu in su 1992 (in domo issoro) crompende·nche a sa semifinale. A sero, imbetzes, b'at a èssere su disafiu intre su Bèlgiu e s'Itàlia. Sos dimònios rujos (finalistas in su 1980 contra a sa Germània Ovest) nche torrant a unu torneu internatzionale a pustis de 12 annos de ausèntzia. Fase de transitzione, imbetzes, pro sos biaitos itàlicos (campiones petzi in su 1968). Est frisca frisca sa noa chi pertocat sa ghia issoro pro su post-europeu: sa Figc at disinnadu chi s'allenadore nou at a èssere su tècnicu de su Torino Giampiero Ventura.

Bruxelles, sa cassa a Salah est ancora aberta

de Lisandru Beccu

Deretos lìberos. Url imàgine

Su livellu de bàrdia abarrat semper artu in Bèlgiu. In intro de note sa politzia at arrestadu 16 pessones suspetadas de apartènnere a s'Isis, ma a Salah Abdeslam no l'ant galu atzapadu. A issu lu cunsìderant su perìgulu nùmeru unu. Su frade si fiat fatu esplòdere in unu ristorante de Parigi sa die de sos atentados. S'àteru frade imbetzes, in un'intervista televisiva, l'at cussigiadu de s'arrèndere. Ma issu nudda, paret chi si nche siat isparèssidu in sas aeras.

Bruxelles armada, arriscu mannu de atentados

de Lisandru Beccu

deretos Statoquotidiano. Url imàgine

A su chi narant sas autoridades belgas, in sa capitale b'at possibilidades mannas chi acontessat sa matessi cosa chi est capitada in Parigi. Su livellu de bàrdia nche l'ant giutu a su màssimu (4 puntos), faghende cumprèndere chi sos tzitadinos si devent isetare cale si siat cosa.