Frantza, Germània e Bèlgiu bolant a sos cuartos. Oe Itàlia-Ispagna e Inghilterra-Islanda

de Màuru Piredda

Incarca subra de s'imàgine pro l'ismanniare

  

Frantza, Germània e Bèlgiu bolant a sos cuartos a pustis de sas partidas de eris contra a s'Irlanda, a s'Islovàchia e a s'Ungheria. Sos frantzesos, vitoriosos gràtzias a duos gol de Griezmann (sos aversàrios fiant in vantàgiu dae su segundu mimutu cun Brady), ant a giogare su 3 de trìulas contra a sa chi at bìnchere su disafiu intre Inghilterra e Islanda. Boateng, Gomez e Draxler sunt imbetzes sos marcadores tedescos. Islovàchia pagu atzuda ma agigu malassortada: Özil s'at faddidu unu rigore. Chie at a giogare contra a sos panzer? Sos ispagnolos o sos italianos? Grandu proa de su Bèlgiu (aversàriu imbeniente de su Galles). Bator sos gol signados dae Alderweireld, Batshuayi, Hazard e Carrasco.

Rùssia a domo, Galles prima natzionale de su grupu B

de Màuru Piredda

Incarca subra de s'imàgine pro l'ismanniare

Domìniu britànnicu in su grupu B, ma est su Galles a ghiare sa classìfica. Nointamen sa derrota contra a sos lacanàrgios inglesos, sos dragones ant torradu a bìnchere oe conchistende unu totale de 6 puntos. Tres sos gol signados contra a sa Rùssia, duos in primu tempus (cun Ramsey e Taylor) e unu in su segundu (cun Bale). Rùssia a domo cun su peus puntègiu (1) e sa peus diferèntzia gol. S'àtera partida, intre Inghilterra e Islovàchia, est acabbada cun unu 0-0 sicu. Ambas cualificadas, in pare cun su Galles, a sos otavos.

Sa Rùssia perdet su disafiu islavu de su grupu B contra a s'Islovàchia

de Màuru Piredda

Incarca subra de s'imàgine pro l'ismanniare

1-2. Est su resurtu de sa gara intre Rùssia e Islovàchia. Su vàntàgiu de sos òmines de Kozak Jan arribat a su de 32 minutos cun Weiss serbidu dae Hamsick. 13 minutos a pustis su tzentrucampista “napoletanu” marcat su 0-2 cun unu gol de galania rara. Sa Rùssia st signadu petzi a su de 80' minutos cun Glushakov. Primos tres puntos pro sos islavos otzidentales chi segudant a su Galles.

Galles deretu a sos tres puntos. Sa Rùssia parègiat in fase de recùperu

de Màuru Piredda

Incarca subra de s'imàgine pro l'ismanniare

2-1. Su Galles at comintzadu su campionadu binchende contra a s'Islovàchia. A sos deghe minutos sos dragones britànnicos ant marcadu su primu gol issoro cun Bale: tiru lìberu prus chi non perfetu e peruna ispera pro su portieri Kozacik. Su parègiu a su de 16 minutos de su segundu tempus cun Duda. Ma a 9 minutos dae s'acabbu de su disafiu sos gallesos ant torradu a signare cun Robson-Kanu. 1-1 intre Inghilterra e Rùssia. Sos inglesos ant marcadu su vantàgiu issoro cun Dier (tiru lìberu e botza in suta de sa traessa), ma sos russos ant paregiadu sos contos a su de 92 minutos cun Berezutski.

Europeos 2016, sas iscuadras e sos disafios de su grupu B

de Màuru Piredda

 

Incarca subra de s'imàgine pro l'ismanniare

 

S'at a giogare in su campu de Bordeaux sa prima partida de su grupu B de sos campionados europeos de fùbalu. Cara a cara sos dragones de su Galles (chi fiant prus de 50 annos sena pigare parte a unu grandu torneu internatzionale) e sos islovacos (chi in pare cun sos tzegos bincheint su trofeu baranta annos a como). Sas àteras duas iscuadras sunt s'Inghilterra e sa Rùssia. Sos tres leones sighint a èssere s'ùnica natzionale europea a àere bìnchidu sa copa de su mundu ma non custa: mannu est, duncas, su disìgiu de cumpensare custa farta. Finamentas sos russos sunt galu a nche l'artziare a chelu sa copa Henri Delaunay: l'ant fatu in su 1960, ma tando fiat s'Unione soviètica de Lev Yashin e Igor Netto. Àtera istòria.

Immigratzione, Europa fortilesa cristiana. Peus pro chie creet in àteros profetas?

de Màuru Piredda

 

Is crònacas ligadas a s'immigratzione sighint a èssere presentes in is pàginas de is giornales, e non pro is traessadas mediterràneas ebbia. Ddoe at acadessimentos chi nos contant un'Europa chi torrat a artziare muros. Che a su chi sunt fraighende in Ungheria, in sa làcana cun sa Sèrbia, pro impedire a sirianos, pachistanos, afganos, eritreos e sòmalos de bi cròmpere. E ddoe nd'at àteros chi, ligados a is gasi naradas raighinas medievales de su continente, nos contant un'Europa chi sèberat is pròfugos cunforma a sa religione issoro (peus pro chie creet in su profeta isballiadu?).