 |
| Incarca subra de s'imàgine pro l'ismanniare |
Su Portugallu e su Galles, binchende in sos cuartos contra a sa Polònia e a su Bèlgiu, nche crompent a sa prima semifinale de su campionadu europeu de fùbalu. S'àtera semifinale at a èssere intre sos chi ant a bìnchere sos disafios de oe (Germània – Itàlia) e de cras (Frantza – Islanda).
Polacos in vantàgiu a pustis de duos minutos dae su comintzu de sa gara gràtzias a Lewandowski. Su parègiu lusitanu a su de 33 cun Sanches. Non sunt bastados sos tempos regulamentares, e nemmancu sos suplementares: sa partida l'ant detzisa sos tiros dae sos 11 metros. Pro sos biancu-rujos de Nawalka ant signadu Lewandowski, Milik e Glik. Rui Patricio bi l'at paradu a Blaszczykowski. Ronaldo, Sanches, Moutinho, Nani, Quaresma sos marcadores portughesos.
Unu bete de gol de s'ex “casteddaju” Nainggolan at fatu suerare sos gallesos a sos 13 minutos dae su comintzu. Ma sos dragones rujos ant paregiadu sos contos petzi 17 minutos a pustis cun Williams, cun sa conca. Robson-Kanu, a su de 55, e Vokes, a su de 86, ant postu acabbu a sos bisos belgas. Cualificatzione de primore pro sos ùnicos britànnicos galu a caddu.
