Sa gioventude indipendentista s'organizat, naschet sa FGI

de Lisandru Beccu

Deretos FGI

Est nàschida oe, in manera ufitziale, sa Federatzione de sa gioventude indipendentista. L'ant presentada custu mangianu in Aristanis, in pratza de Marianu. In sa mesa de sos reladores fiant presentes Càralu Manca, Andria Pili, Dàvide Pinna e Austinu Peru, chi ant ammustradu su sìmbulu de sa federatzione e ant descritu su progetu e sas punnas suas. «Amus a operare in sos setores de s'educatzione e de su traballu in favore de sos giòvanos – ant antitzipadu in unu comunicadu – pro fàghere a manera de pòdere atuare una soverania reale in s'iscola, in s'Universidade e in contu de polìticas pro su traballu giovanile».

Sos passos imbenientes ant a prevìdere paritzas presentadas a rodeu in su territòriu pro presentare s'òrganu nou e pro crèschere sa base militante. B'ant a pòdere aderire pitzocas e pitzocos intre sos 14 e sos 30 annos.

«Sa FGI no est emanatzione de perunu partidu e no at a leare parte a peruna cumpetitzione eletorale» ant acraridu sos ativistas, agiunghende chi sas persones chi ant a leare parte a su movimentu ant a traballare in pare pro ismanniare sa cussèntzia natzionale sarda e pro fraigare unu fronte comune contra a su colonialismu italianu. In sos meses imbenientes amus a bìdere in cale manera.

Contròrdine: torrant is Provìntzias (e acò·ddas is Àreas metropolitanas de Tàtari e Terranoa)

de Màuru Piredda

Sighit sa dibata pro su chi pertocat sa riforma regionale de is Entes locales. A coa de s'annu coladu s'assessore Cristianu Erriu aiat naradu chi «is Comunas sunt is protagonistas verdaderas de su cambiamentu» e chi «is livellos amministrativos e de guvernu divenint duos». Est a nàrrere is Comunas e sa Regione. Ma «previdimus un'afortiamentu de s'assotziatzionismu comunale pro mèdiu de s'Unione de is Comunas (e de s'assòtziu de is Uniones)». Est a nàrrere bator livellos (e non duos). Sena cunsiderare sa tzitade metropolitana de Casteddu chi aiat fatu inchietare “lu sindaggu di Sàssari” (immaginemus·nos a Nigola Sanna narende «acchì zonchi semmu?»). Sena cunsiderare is Àmbitos otimales e is Àmbitos territoriales istratègicos cun is funtziones issoro. Piticu s'isturuddu!