 |
| deretos Statoquotidiano. Url imàgine |
A su chi narant sas autoridades belgas, in sa capitale b'at
possibilidades mannas chi acontessat sa matessi cosa chi est capitada in
Parigi. Su livellu de bàrdia nche l'ant giutu a su màssimu (4 puntos),
faghende cumprèndere chi sos tzitadinos si devent isetare cale si siat
cosa.
S'avisu de su Ministeru de s'internu faeddat de “un'imminente
minetza grae, in totu sa regione de Brussel, chi rechedet normas de
seguràntzia dislindadas e cussìgios a sa populatzione”. Sa nota sighit narende chi “tocat de evitare sos logos in ue b'at gente meda: cuntzertos, istatziones ferroviàrias, aeroportos e tzentros cummertziales”.
Sas bator lìnias de sa metropolitana sunt tancadas nessi fintzas a
lunis e sas partidas de fùbalu de sas categorias printzipales ant a
èssere totu rinviadas, a sa matessi manera sos eventos isportivos de sas
àteras disciplinas. S'interventu de su guvernu belga arribat a cajone
de sos arrestos de eris de noe pessones implicadas in sos degòllios de
Parigi. In prus, sos investigadores ant iscobertu un'arsenale de armas e
de produtos chìmicos e esplosivos in su bighinadu de Molenbeek.
