Dae su 2025 diesel vietadu in bator tzitades

de Lisandru Beccu

Deretos Simone Ramella. Url imàgine

Sos sìndigos de bator intre sas tzitades prus mannas de su mundu cherent firmare s'impreu de sos motores diesel dae inoghe a deghe annos. Parigi, Madrid, Tzitade de su Mèssicu e Atene cherent punnare a megiorare sa calidade de s'àera e l'ant a fàghere cun sos intzentivos a s'impreu de veìculos alternativos e de bitzicletas.

Su Bataclan torrat a abèrrere a un'annu dae su degollu

de Lisandru Beccu

Cumintzeint in su mese de abrile de ocannu sos traballos de rinnovamentu de su Bataclan, su teatru protagonista de su disacatu firmadu dae Daesh. Sas vìtimas de s'atacu fiant 93. Su 12 de custu mese, a pustis de un'annu, sa sala de ispetàculos at a torrare a abèrrere.

Su riprìstinu de sas infrastruturas e de sos trastes no at mudadu s'aspetu de su locale chi at mantesu sas particularidades suas e at costoidu s'ànimu populare e festulanu. At a èssere Sting a inaugurare s'istajone noa de su teatru. «Cun s'abertura de su Bataclan amus duas cosas de fàghere: sa de ammentare e onorare totu sos chi sunt mortos un'annu a como e su de tzelebrare sa vida e sa mùsica chi rapresentat custu logu» at iscritu su cantadore inglesu in su situ internet suo.

Sos ricavos de sos billetes ant a èssere donados a s'assòtziu “Life For Paris and 13 Novembre: Fraternité Verité”.

Cop21, s'acordu b'est

de Lisandru Beccu

S'intesa chi at a permìtere a su mundu de limitare su caentamentu globale est realidade. A pustis de 15 dies, sos paisos chi ant leadu parte a s'addòbiu, ant agatadu una sìntesi. Su patu at a pònnere règulas a totu sos istados pro fàghere a manera chi s'iscardamentu globale nch'abarret in su lìmite de unu gradu e mesu. Fintzas sa Tzina e s'Ìndia a ùrtimu ant aderidu dende un'ispera manna pro su benidore.

Parigi. Cop21. Su clima no est de sos mègius. S'annùntziat temporada mala

de Maurìtziu Sale

Deretos, Ansa/Ap. Url imàgine

Parigi, tabernàculu de sa cultura europea. De s'arte. De sas etnias vàrias e, pro cussu, diferentes. Fraile famadu de sa protesta e de sa rivolutzione. E dae eris sa capitale mundiale de su clima. Finas si su clima, dolet a l'ammìtere, no est de sos mègius. Dificultades mannas, amus bidu, pro leare un'acordu globale chi potzat èssere profetosu, unìvocu e mescamemte rispetadu. E anneos, fartas e dispetos finas in àmbitu polìticu a dae chi - aprofitende de s'ocasione chi los bidet totus in pare - su trùbulu non est mancadu.

Parigi. Die de ammentu solenne pro sas vìtimas. Hollande: «Peruna làstima pro sos mortores»

de Maurìtziu Sale

Deretos, Ansa/Epa. URL imàgine

Oe, in sa corte de Les Invalides, sos invàlidos, corfados a su coro e a s'ànima, fiant in medas, a dolu mannu. E medas sas làgrimas, a las contare. Sa Marsilliesa, pro nche mòvere sos istintos cugugiados o caratzados finas a tando, pro torrare in assentu dèghidu e patriòticu sos presentes. E posca su silèntziu, acumpangiadu dae su sonu surdu de su mudìmene generale, de sa suferèntzia, de s'impotèntzia. Una cantas famìlias, a vèsperu bassu comente a bias si costumat in crèsia, ant cuntestadu s'ausèntzia de disinnos fortes contra a su terrorismu, dae banda de s'Istadu. Àteros, cun grandu dignidade, ant seberadu de iscurtare ebbia, a sa ritza, immòbiles, sas paràulas de su presidente. E Hollande non los at delùdidos. Cun sa retòrica de semper, sa matessi retòrica de màdrighe bèllica chi at impreadu fintzas eris, chirchende·si sos alleados pro sa gherra contra a Daesh, los at istentados pro una bona iscuta.