Fùbalu, Portugallu campione de Europa

de Màuru Piredda 

Finale de sos europeos cunditzionada dae s'infortùniu de Cristiano Ronaldo a pagos minutos dae su frùschiu de comintzu de Clattenburg: s'atapada cun Payet (a su de 8 minutos) non paret grae ma, a su pesa-rue e cun sas làgrimas in ogros, Cr7 devet renuntziare lassende su campu a su de 25 minutos.

Itàlia e Islanda a sos cuartos. Ispagna e Inghilterra a domo

de Màuro Piredda

Incarca subra de s'imàgine pro l'ismanniare

S'Inghilterra nch'essit duas bias dae s'Europa e s'Ispagna (torra inguvernabile?) no agatat tzertesas in su fùbalu. Sas partidas de eris las ant bìnchidas s'Islanda e s'Itàlia chi, gasi, nche crompent a sos cuartos in pare cun Frantza, Germània, Galles, Bèlgiu, Polònia e Portugallu.
Sos inglesos, nointamen su vantàgiu de Rooney (dae sos 11 metros), ant pigadu duos gol: Ragnar Sigurdsson at signadu a pustis de duos minutos; Sigthorsson a su de 19. 2-0 pro s'Itàlia cun Chiellini e Pellè.

Frantza, Germània e Bèlgiu bolant a sos cuartos. Oe Itàlia-Ispagna e Inghilterra-Islanda

de Màuru Piredda

Incarca subra de s'imàgine pro l'ismanniare

  

Frantza, Germània e Bèlgiu bolant a sos cuartos a pustis de sas partidas de eris contra a s'Irlanda, a s'Islovàchia e a s'Ungheria. Sos frantzesos, vitoriosos gràtzias a duos gol de Griezmann (sos aversàrios fiant in vantàgiu dae su segundu mimutu cun Brady), ant a giogare su 3 de trìulas contra a sa chi at bìnchere su disafiu intre Inghilterra e Islanda. Boateng, Gomez e Draxler sunt imbetzes sos marcadores tedescos. Islovàchia pagu atzuda ma agigu malassortada: Özil s'at faddidu unu rigore. Chie at a giogare contra a sos panzer? Sos ispagnolos o sos italianos? Grandu proa de su Bèlgiu (aversàriu imbeniente de su Galles). Bator sos gol signados dae Alderweireld, Batshuayi, Hazard e Carrasco.

Polònia, Portugallu e Galles a sos cuartos, oe àteros tres disafios

de Màuru Piredda

Incarca subra de s'imàgine pro l'ismanniare

Sos otavos de finale de sos europeos frantzesos sunt comintzados eris cun tres partidas. 1-1 su disafiu intre Isvìtzera e Polònia a pustis de 90 minutos regulares e de àteros 30 suplementares. Gol de Błaszczykowski pro sos polacos a su de 39; parègiu elvèticu cun Shaqiri a su de 82. Bi sunt chertos sos rigores.

Grupu E, s'Irlanda vitoriosa contra a s'Itàlia conchistat sos otavos. Biaitos e dimònios rujos a 6 puntos

de Màuru Piredda

Incarca subra de s'imàgine pro l'ismanniare

Cun sas partidas de oe est concruida sa fase de cualificatzione chi at bidu 24 natzionales cunfrontende·si in 6 girones. Pro su chi pertocat su grupu E b'at àpidu duos 0-1. E ambas retes pagu prus o mancu a sos chimbe minutos dae su de 90. S'irlandesu Brady, cun sa conca, at signadu contra a s'Itàlia lassende su thiniscolesu Sirigu a manos iscutas. Sos pitzocos birdes si cualificant a sos otavos. Nainggolan imbetzes est su marcadore de su Bèlgiu contra a s'Isvètzia.

In su girone F s'Ungheria e s'Islanda cumandant sa classìfica a 5 puntos

de Lisandru Beccu

Incarca subra de s'imàgine pro l'ismanniare

In sos minutos de recùperu s'Islanda conchistat sa vitòria chi li permitit de si cualificare a su turnu imbeniente. Bodvarsson nche giughet in vantàgiu sos suos a su de 18 minutos, ma bi pensat Schopf a paregiare sos contos a su de 60 minutos. Sa partida pariat cundennada a acabbare cun unu parègiu, ma sos isulanos, a su de 94 minutos, movent in contratacu e nche marcant su gol de sos tres puntos cun Traustason.

Su Portogallu imbetzes otenet su de tres parègios a fila a pare, ma recùperat a Cristiano Ronaldo chi, in sas ùrtimas partidas, fiat agigu in umbra. S'Ungheria cumintzat bene e a su de 19 minutos nche marcat su vantàgiu gràtzias a su mànchinu de Gera. Su parègiu lusitanu arribat cun Nani in antis de sa pàusa. In su segundu tempus est torra s'Ungheria a paregiare cun unu tiru lìberu de Dzsudzsák chi corfat a sa barriera e nch'intrat a porta. Su Portogallu torrat a paregiare e custa borta bi pensat Ronaldo cun unu bellu corfu de tacu. S'àteru gol de Dzsudzsák arribat a su de 54 minutos, ma non serbit a nudda ca Ronaldo torrat a paregiare a su de 62 minutos cun unu corfu de conca. Acabbat 3-3.

Grupu D, s'Ispagna perdet e si prenotat su disafiu de sos otavos contra a s'Itàlia

de Màuru Piredda

Incarca subra de s'imàgine pro l'ismanniare

Nointamen su vantàgiu ispagnolu (a su de 7 minutos cun Morata), sa Croàtzia est resèssida a bìnchere crompende·nche a 7 puntos. Pro sos islavos ant signadu Nikola Kalinic in s'acabbu de su primu tempus e Perisic a su de 87 minutos. S'Ispagna, segunda, at a disafiare s'Itàlia in sos otavos. 0-2 su resurtu intre Repùblica Tzega e Turchia. Anatòlicos in gol cun Yilmaz a su de 10 minutos e cun Tufan a su de 65.

Germània e Polònia torrant a bìnchere crompende·nche a 7. Derrota Ucraina, peruna cualificatzione

de Màuru Piredda

Incarca subra de s'imàgine pro l'ismanniare

Sos duos disafios chi ant serradu su girone de cualificatzione de su grupu C los ant bìnchidos sa Germània (contra a sos nord-irlandesos) e sa Polònia (contra a s'Ucraina). Ambas partidas cun su resurtu de 1-0. Pro sos tedescos at signadu Mario Gomez a su de 29 minutos; pro sos polacos Blaszczykowski a su de 54. Nointamen sos sete puntos pro ambas natzionales, sa Germània nch'est in su cùcuru de sa classìfica gràtzias a sa mègius diferèntzia gol.

Rùssia a domo, Galles prima natzionale de su grupu B

de Màuru Piredda

Incarca subra de s'imàgine pro l'ismanniare

Domìniu britànnicu in su grupu B, ma est su Galles a ghiare sa classìfica. Nointamen sa derrota contra a sos lacanàrgios inglesos, sos dragones ant torradu a bìnchere oe conchistende unu totale de 6 puntos. Tres sos gol signados contra a sa Rùssia, duos in primu tempus (cun Ramsey e Taylor) e unu in su segundu (cun Bale). Rùssia a domo cun su peus puntègiu (1) e sa peus diferèntzia gol. S'àtera partida, intre Inghilterra e Islovàchia, est acabbada cun unu 0-0 sicu. Ambas cualificadas, in pare cun su Galles, a sos otavos.

Isvìtzera e Frantza sena gol, Albania a su de tres postos e Romania ùrtima

de Lisandru Beccu

Incarca subra de s'imàgine pro l'ismanniare

Oe est cumintzadu s'ùrtimu turnu de su girone, cun su grupu A chi at abertu sas dantzas. Sa Frantza, contra a sos fradiles isvìtzeros no est andada prus a dae in antis de su 0-0. Ambas sas iscuadras, tantu, teniant giai sa cualificatzione in butzaca. Sas àbbilas balcànicas, imbetzes, ant bìnchidu 1-0 contra a sa Romania, resessende a conchistare su de tres postos in su girone. S'Albania nche colat in vantàgiu a s'acabbu de su primu tempus gràtzias a s'incorrada de Sadiku chi aprofitat de unu passàgiu traessu de Memushaj.

Segundu giru de su grupu F cun duos parègios

de Màuru Piredda

Incarca subra de s'imàgine pro l'ismanniare

Duos parègios serrant su segundu giru de disafios de su grupu F. 1-1 intre Islanda e Ungheria. Sos nòrdicos ant marcadu su vantàgiu issoro a su de 40 minutos cun Sigurdsson, ma sos magiaros lis ant impedidu su sorpassu in classìfica signende a su de 88 (autogol de Saevarsson). Ungheria a 4 puntos e possibilidades mannas de si cualificare a sos otavos. 0-0 intre Portugallu e Àustria. Lusitanos perigulosos pro totu sa partida: Ronaldo (dae sos 11 metros) e Nani ant corfadu su palu.

Grupu E, su Bèlgiu balàngiat tres puntos

de Màuru Piredda

Incarca subra de s'imàgine pro l'ismanniare

Sa natzionale belga at bìnchidu sa prima partida sua de sos europeos de Frantza. A pustis de sa derrota contra a s'Itàlia, sos 11 de Wilmots nch'ant tzacadu tres botzas in sa porta irlandesa. Sos gol de sos dimònios rujos in su segundu tempus. Marcadores Lukaku (a su de 48 minutos e a su de 70) e Witsel (a su de 61).

3 gol a sa Turchia, Ispagna a sos otavos. 2-2 intre Repùblica Tzega e Croàtzia

de Màuru Piredda

Incarca subra de s'imàgine pro l'ismanniare

Puntègiu prenu pro sas fùrias rujas. Sos ispagnolos ant bìnchdu 3-0 contra a una Turchia oramai cundennada a si nche torrare a Anatòlia a pustis de su disafiu de martis chi benit contra a sa Repùblica tzega (chi oe at paregiadu 2-2 cun sa Croàtzia). Duas sas retes ibèricas in su primu tempus: a su de 34 minutos cun Morata e a su de 37 cun Nolito. Babacan atzantaradu in giru de tres minutos. Su de tres gol in su segundu tempus, a bator minutos dae su comintzu: Morata, serbidu dae Alba, realizat sa prima dopieta de s'europeu.

Éder nche giughet s'Itàlia a sos otavos. Cras Bèlgiu contra a Irlanda

de Màuru Piredda

Incarca subra de s'imàgine pro l'ismanniare

B'at chertu 88 minutos pro nche pònnere in sa rete sa botza de sa vitòria. Éder, cun su pee destru, nche l'at tzacada serente a su segundu palu sena chi s'isvedesu Isaksson la poderet tènnere. Cun custa vitòria sos biaitos prenotant sa cualificatzione a sos otavos crompende·nche a 6 puntos. Cras su disafiu intre Bèlgiu e Irlanda.

Germània – Polònia sena gol: ambas a 4. Surra noa pro s'Ucraina

de Màuru Piredda

Incarca subra de s'imàgine pro l'ismanniare

S'Ucraina at torra pèrdidu. Duas sas retes de sos nord-irlandesos, ambas in su segundu tempus: a su de 49 minutos McAuley cun sa conca serbidu dae unu tiru traessu; a su de 94 cun McGinn a pustis de sa parada de Pyatov. Sena gol su disafiu intre Germània e Polònia, nointamen sas ocasiones chi ant tentu ambas sas iscuadras.

Grupu B, S'Inghilterra binchet contra a su Galles e conchistas su cùcuru de sa classìfica

de Màuru Piredda

Incarca subra de s'imàgine pro l'ismanniare

Vitòria in fase de recùperu pro s'Inghilterra. Su Galles colat in vantàgiu a su de 42 minutos cun Bale: tiru lìberu e su portieri Hart a manos iscutas. Su parègiu inglesu a 11 minutos dae su comintzu de su segundu tempus cun Vardy. A su de 91 su gol detzisivu cun Sturridge serbidu dae Alli: peruna ispera pro Hennessey. Gràtzias a custu resurtu s'Inghilterra conchistat su cùcuru de sa classìfica.

Grupu A, a su segundu giru sa Frantza nche crompet a 6 puntos

de Màuru Piredda

Incarca subra de s'imàgine pro l'ismanniare

1-1 su disafiu intre Romania e Isvìtzera. Vantàgiu de sos romenos a su de 18 minutos cun Stancu (dae sos 11 metros). Su gol elvèticu a su de 57 cun Mehmedi: tiru cun su pee mànchinu, Tatarusanu non bi crompet. A sero sa vitòria de sa Frantza: gol de Griezmann chi nch'at tzacadu sa botza in su cugione de sa porta aversària. In sa fase de recùperu su radòpiu de Payet.

Sa Rùssia perdet su disafiu islavu de su grupu B contra a s'Islovàchia

de Màuru Piredda

Incarca subra de s'imàgine pro l'ismanniare

1-2. Est su resurtu de sa gara intre Rùssia e Islovàchia. Su vàntàgiu de sos òmines de Kozak Jan arribat a su de 32 minutos cun Weiss serbidu dae Hamsick. 13 minutos a pustis su tzentrucampista “napoletanu” marcat su 0-2 cun unu gol de galania rara. Sa Rùssia st signadu petzi a su de 80' minutos cun Glushakov. Primos tres puntos pro sos islavos otzidentales chi segudant a su Galles.

Grupu F, a concruos de su primu giru petzi s'Ungheria a tres puntos

de Màuru Piredda

Incarca subra de s'imàgine pro l'ismanniare

Cun duos gol, s'Ungheria at binchidu sa prima partida de su grupu F contra a s'Àustria. Szalai (a su de 62 minutos) e Stieber (a su de 87) sos marcadores magiaros. 1-1 su resurtu intre Portugallu e Islanda. Vantàgiu lusitanu a sos 30 minutos cun Nani. Su parègiu islandesu cun Bjarnason a su comintzu de su segundu tempus.

Grupu E. Parègiu intre Irlanda e Isvètzia. Vitòria italiana contra a su Bèlgiu

de Màuru Piredda

Incarca subra de s'imàgine pro l'ismanniare

A pustis de unu primu tempus sena perunu gol, s'Irlanda at mudadu s'andanta de sa partida a duos minutos dae su comintzu de su segundu. Gràtzias a unu tiru traessu de Coleman, dae manu dereta, Hoolahan nch'at insertadu sa botza in su cugione de sa porta amparada, finas a tando e cun profetu, dae Isaksson. A su de 69 minutos s'Isvètzia at paregiadu pro more de un'autogol de Clark. Giaccherini e Pellè, imbetzes, sunt sos marcadores italianos contra a su Bèlgiu. Cun custu resurtu sos biaitos ghiant sa classìfica de su girone.