de Màuru Piredda
Finale de sos europeos cunditzionada dae s'infortùniu de Cristiano
Ronaldo a pagos minutos dae su frùschiu de comintzu de Clattenburg:
s'atapada cun Payet (a su de 8 minutos) non paret grae ma, a su pesa-rue
e cun sas làgrimas in ogros, Cr7 devet renuntziare lassende su campu a
su de 25 minutos.
In s'ìnteri sa Frantza no isfrutat un'ocasione a su de
10 cun Griezmann: Rui Patrício est capatze de evitare su 0-1. Su
Portugallu, in dificultade, sufrit dae tando prus de un'incursione de
sos biaitos sena lis opònnere perìgulu perunu.
Pagu prus o mancu sa
mùsica est sa matessi a su comintzu de sa ripresa cun Pepe chi si
cunfirmat su pilastru de sa defensa lusitana. Bona sa proa de Payet chi
essit a su de 58 minutos: Deschamps faghet intrare a Coman, su prus
giòvanu intre sos frantzesos a giogare una finale (20 annos in pessu
cròmpidos).
Nemmancu intradu, Coman serbit unu passàgiu traessu a Griezmann
chi, cun sa conca proat a nche l'intrare faddende·si·la de pagu. A su
de 68 s'ex juventinu bi torrat a proare dae foras de s'àrea, ma sena
incuadrare sa porta aversària. 7 minutos a pustis sa Frantza est torra
perigulosa cun Girou, ma Rui Patricio est prontu.
A su de 80 est su Portugallu a mustrare sas ungras cun Quaresma chi isfòderat una bitzicleta repentina a pustis de una prima denegada de Lloris (contra a unu tiru traessu dae manu dereta). Bi proat finamentas, Nani, unu minutu a pustis, ma a su de 84 est torra sa Frantza a assuconare cun unu tiru balìsticu de Sissoko.
Su palu de Cignac in su recùperu una cosa ebbia
narat: tempos suplementares.
A su de 95 minutos Pepe, cun sa conca, ponet a tìmere sa defensa
frantzesa, ma Clattenburg aiat fruschiadu su foras de giogu. Bi proat
finamentas Eder, semper cun sa conca, ma Lloris parat.
A pustis de una traversa de Guerreiro (a su de 108 minutos), sos lusitanos signant cun Eder: tiru detzisu e gol.
A su de 123 minutos Clattenburg frùschiat. Portugallu campione de Europa.
Portugallu: Rui Patrício, Cédric
Soares, Pepe, José Fonte, Raphael Guerreiro, Adrien Silva (67' João
Moutinho), William Carvalho, Renato Sanches (78' Eder), Nani, Cristiano
Ronaldo (25' Quaresma), João Mário. Allenadore: Santos
Frantza:
Lloris, Sagna, Koscielny, Umtiti, Evra, Pogba, Matuidi, Sissoko (110' Martial),
Griezmann, Payet (58' Coman), Giroud (78' Gignac). Allenadore: Deschamps
Arbitru: Clattenburg
Gol: 109' Eder
