Isvìtzera e Frantza sena gol, Albania a su de tres postos e Romania ùrtima

de Lisandru Beccu

Incarca subra de s'imàgine pro l'ismanniare

Oe est cumintzadu s'ùrtimu turnu de su girone, cun su grupu A chi at abertu sas dantzas. Sa Frantza, contra a sos fradiles isvìtzeros no est andada prus a dae in antis de su 0-0. Ambas sas iscuadras, tantu, teniant giai sa cualificatzione in butzaca. Sas àbbilas balcànicas, imbetzes, ant bìnchidu 1-0 contra a sa Romania, resessende a conchistare su de tres postos in su girone. S'Albania nche colat in vantàgiu a s'acabbu de su primu tempus gràtzias a s'incorrada de Sadiku chi aprofitat de unu passàgiu traessu de Memushaj.

Grupu A, a su segundu giru sa Frantza nche crompet a 6 puntos

de Màuru Piredda

Incarca subra de s'imàgine pro l'ismanniare

1-1 su disafiu intre Romania e Isvìtzera. Vantàgiu de sos romenos a su de 18 minutos cun Stancu (dae sos 11 metros). Su gol elvèticu a su de 57 cun Mehmedi: tiru cun su pee mànchinu, Tatarusanu non bi crompet. A sero sa vitòria de sa Frantza: gol de Griezmann chi nch'at tzacadu sa botza in su cugione de sa porta aversària. In sa fase de recùperu su radòpiu de Payet.

S'Isvìtzera binchet contra a s'Albania e andat a 3 cun sa Frantza

de Màuru Piredda

Incarca subra de s'imàgine pro l'ismanniare

A pustis de su disafiu intre Frantza e Romania, pro su grupu A ant in pessu giogadu s'Isvìtzera e s'Albania. Partida curiosa, a dae chi agigu de giogadores cun sàmbene albanesu bestint sa màllia elvètica e a dae chi unos cantos giogadores de sa natzionale balcànica nche sunt nàschidos in sos tretos de sa cunfederatzione. In prus, sa gara fiat unu derby intre sos frades Xhaka: Granit cun sa Schweizer Nati, Taulant cun sa Shqiponja, s'àbbila niedda cun duas concas. Vitòria de sos elvèticos gràtzias a unu gol de Schär a chimbe minutos dae su comintzu de sa gara.

Europeos 2016, sas iscuadras e sos disafios de su grupu A

de Màuru Piredda 

Incarca subra de s'imàgine pro l'ismanniare

Albania, Frantza, Romania e Isvìtzera sunt sas iscuadras de su grupu A chi s'ant a disafiare pro nche cròmpere a sos otavos de finale. Custa editzione de sos europeos at a èssere sa prima cun sa presèntzia de sos albanesos. Ghiados dae s'italianu Gianni De Biasi ant conchistadu sa cualificatzione classifichende·si segundos a palas de su Portogallu. Sos biaitos de Didier Deschamps, a pustis de àere bìnchidu s'Europeu in su 1984 e in su 2000, ant a carcare su campu de domo issoro cun sa punna de su tris. A su chi si narat, semper e cando, at a cunfirmare su ruolu suo de protagonista. Sa Tricolorii rumena de Victor Piţurcă, in s'istòria de custos campionados, non nch'at barigadu sos cuartos (in su 2000 perdeit contra a s'Itàlia). Mannu su disìgiu de fàghere mègius. S'Isvìtzera, imbetzes, nche crompet a custu torneu a pustis de sas cualificatziones cun 7 vitòrias in 10 garas: segunda in fatu a s'Inghilterra.