Bossi-Fini, pro no ismentigare e pro non nos nch'istracare mai de lu repìtere

de Maurìtziu Sale

Deretos Sergio Staino

Sa Lege 189 est una lege mala, fartosa, trampera e nàschida betza. Tenet su sabore de s'acusa apriorìstica, de sa cundenna sena protzessu e mescamente sena apellu. Est ischirriadora, ratzista e, suta una severidade normativa presunta, nche caratzat una voluntade discriminatòria chi non tenet nen sentidu nen balia parìviles, in s'istòria de sa repùblica italiana.

Emigrantes, cumintzat sa tràmuda dae Vintimìllia

de Lisandru Beccu

Deretos ilfattoquotidiano.it. Url imàgine

Est prevìdidu pro custu mangianu su primu isbarcu de una chimbantina de emigrantes in s'aeroportu de Su Masu. At a èssere su primu de tres trasportos chi nch'at a batire 135 pròfugos dae Vintimìllia a Sardigna.

Emigrantes: in su 2016, finas a como, 3.176 mortos

de Lisandru Beccu

Deretos Ansa/Epa

Dae su cumintzu de s'annu in su Mediterràneu b'at mortu 3.176 pessones. Fiat totu gente chi nche cheriat intrare a Europa pro fuire dae sa misèria e dae sa gherra. Cara a sas costas italianas nche nd'at mortu 2.742.

Sunt custos sos datos de s'Oim (Organizatzione mundiale de sas migratziones). Su nùmeru de sas vìtimas est giai prus artu cunforma a su matessi perìodu de s'annu coladu e currispondet a su dòpiu cunforma a ghennàrgiu-austu de su 2014. Dae su cumintzu de ocannu, dae mare, nch'at arribadu 263.636 emigrantes, prus chi no àteru a Grètzia (160.888) e a Itàlia (100.244).

Naufràgiu de su 2015, acabbadas eris sas operatziones de recùperu de sos corpos

de Lisandru Beccu

Deretos Reuters. Url imàgine

Sa barca si nch’afundeit su mese de abrile de su 2015 e a como resurtat su naufràgiu prus mannu de su mediterràneu. Eris, a prus de un'annu dae sa disaura, sa marina italiana nch'at acabbadu sas operatziones de recùperu de sos corpos.

Idomeni, Grètzia. Cumintzat oe sa tràmuda de 8400 pròfugos

de Maurìtziu Sale

Deretos rtve  URL imàgine

Campu pròfugos de Idomeni, in Grètzia a làcana cun sa Matzedònia. Unos cantos giornalistas, parafrasende a Dante cun una similitudine forsis atrivida, ma serente, l’aiant definidu su Limbu infernale. Unu logu a ue fiat fàtzile a intrare, contra a sa voluntade, ma dae ue fiat impossìbile a fuire. Una cundenna. Unu Limbu, pròpiu. Unu cugione in ue nch’iscontare sos pecados finas sena nd’àere cummìtidu. Mescamente sos pipios. A chentinas, a mìgias, issipidos in una cherina istrinta, ludrosa e sena venidore.

Emigrantes. Acordu Ue Turchia intre rimpàtriu e disterru fortzadu

de Maurìtziu Sale

Deretos Afp URL imàgine

Sunt mòvidos arbeschende a eris sos primos emigrantes sutapostos a sa lege-acordu  intre Ue e Turchia.  Dae sas ìsulas de Lesbo e Chios, cun sa prua conca a Dikili, su portu turcu in ue ant organizadu sos controllos de ritu. Disterrados a bordu de una cantas naes a cabotàgiu lèbiu atuende sos impòsitos de Bruxelles. Fiant 202 in totu. Su prus pachistanos (130) e afganos (42).

Dae Lesbo fiant 136: una fèmina ebbia e 135 òmines. Duos fiant sirianos chi no intraiant in su programa de rimpàtriu e nât chi diant àere seberadu a contu issoro de torrare a Turchia. Àteros 66 dae Chios: 56 òmines 10 fèminas, su prus afganos. A su chi si leghet in Ana, s'agentzia de imprenta grega, in intro de pusticràs (su 6 de abrile) su nùmeru cumplessivu de sos chi diant dèvere mòvere est 750. Cunsiderados illegales. Ca s'aiant leadu a sa sola su caminu conca a s'Europa.

Cunforma a s'acordu  - firmadu, ammentamus, su 18 de martzu in pessu coladu -   s'Unione europea diat dèvere acasagiare ateretantos pròfugos sirianos chi como sunt in territòriu turcu. Unu pranu malefadadu? Unu disinnu a làcana cun sa violatzione de sos deretos umanos, comente afirmant sas organizatziones non guvernativas? A sa segura est imboligosu che a pagos. E in parta bi sunt sa salude, sa dignidade e sa suferèntzia de chie est fuende dae su dolore pro si nche rùere a intro de sa bartza de sos acordos internatzionales.  Patos forsis petzi monetàrios, a sa segura pagu umanitàrios.

Emigrantes. Movet su disafiu de sos rimpàtrios in acordu cun sa Turchia

de Maurìtziu Sale

Deretos i.huffpost  URL imàgine

Nch’at coladu in pessu duas dies dae s’acordu Ue –Turchia. Acordu istòricu in contu de migratzione a corfos de dinare e de cuntzessiones imboligosas, cumplicadas e inìcuas. Patu in ue  - a su chi narant unas cantas organizatziones non govenativas -  s’Unione europea nch’at barigadu in prus de unu puntu sas làcanas de su deretu internatzionale. Traighende su sentidu, s’impinnu e su traballu dìligu issoro. 

Sas chèscias movent dae Amnesty International, dae Mèigos sena làcanas, dae Oxfam, dae Fidh e dae Cir, chi si sunt pesadas paris cumpatas contra a su chi ant definidu «s'acordu de sa birgòngia». In ue paret violada sa cunventzione de Ginevra. Cunventzione chi sa Turchia no at mai sutaiscritu, mai collidu e duncas mai rispetadu. Frocant sas crìticas dae totu su mundu. S’assentu internatzionale est in birbìllios a dae chi sos deretos tziviles primàrios, in Turchia, nche sunt torrados pagu prus chi no a farfarùgia.

Emigrantes. Cròmpidu s’acordu Ue-Turchia

de Maurìtziu Sale 

Deretos Ansa  URL imàgine

Aprovadu oe, in Bruxelles, su testu de acordu cun sa Turchia in contu de emigrantes. Sa noa, comente si costumat oe, l'at dada in twitter Juha Sipila, su Primu ministru finlandesu. Cunforma a su documentu a ue nche sunt cròmpidos oe sos majores de sos 28 istados Ue  - chi ammentamus tenet giai su cunsensu dae Ankara - dae domìniga 20 de martzu sa Turchia at a retzire e a acasagiare totu sos emigrantes irregulares. Sos chi sunt in biàgiu conca a sa Grètzia. S'òmine de mesu in s'acordu, pro contu de su Consìgiu europeu, fiat Donald Tusk chi at propostu su testu nou a pustis de s'addòbiu cun su Primu ministru turcu Ahmet Davutoglu. Ankara at duncas atzetadu su printzìpiu chi totu sos emigrantes, fintzas sos chi sunt petzi in chirca de traballu e non de asilu, devant torrare in segus dae sa Grètzia a sa Turchia. Pro cada pròfugu allogadu in territòriu turcu, dae Ankara b'at a mòvere unu sirianu conca a s'Europa. Cun custu mecanismu diat dèvere menguare su nùmeru de sas traessadas marìtimas. Sas traessadas de sa morte. In su testu de s'acordu est prevìdidu fintzas s'apretu pro su versamentu de sos primos 3 milliardos de èuros in agiudu pro sa Turchia. E finas s'abertura de su capìtulu negotziale 33 (su chi pertocat su bilantzu) pro s'adesione de sa Turchia a s'Unione europea. Sos traballos si sunt serrados cunfirmende chi sa de oe est una mesura temporànea chi tenet petzi sa punna de arressare sos biàgios de sa morte rugrende su mare Egeu. Traessadas, a dolu mannu, galu in manos a sos contrabbanderis.

Emigrantes, 21 mortos in sas marinas turcas

de Lisandru Beccu

Deretos AP, Url imàgine

Non lis bastat su fritu e su tempus malu a sos emigrantes pro firmare s'èsodu contra a s'Europa. Sa frea de sa gherra binchet in subra de sas àteras timòrias. Custu mangianu sas autoridades turcas ant annuntziadu chi ant agatadu 21 pròfugos mortos in duos giassos diferentes de sa costa turca. Forsis, a su chi narat sa bàrdia de mare, fiant in chirca de nche cròmpere a s'ìsula grega de Lesbo, ma sas barcas si nche lis sunt trouladas. Nd'ant agatadu ùndighi in sa marina de Ayvalik e àteros deghe in Dikili. Ancora non si connoschent sas natzionalidades de sas vìtimas, ma s'ischit chi intre sos 21 poberitos b'at nessi tres pitzinnos.

Migrantes. Nùmeros semper in crèschida

de Maurìtziu Sale

Deretos lìberos, Url imàgine

Nch'at barigadu su millione su nùmeru de sos emigrantes chi nche sunt cròmpidos ocannu a Europa. Unu disterru chi non connoschet arrèschida. Gente su prus fuende dae logu de fàmene e de trùbulos bèllicos. Sunt datos isparghinados dae s'Organizatzione internatzionale pro s'emigratzione (Oim) e dae su Cummissariadu de sas natziones aunidas pro sos disamparados (Unhcr). Si leghet in sos documentos chi sunt 1.005.000 sos pròfugos chi a eris, su 22 de su mese de nadale, sunt cròmpidos a Grètzia, a Bulgaria, a Itàlia, a Ispànnia, a Malta e a Tzipru. Su bonu sunt sirianos (su 50%); posca afghanos (su 20%), irachenos e eritreos. A custos nche devimus agiùnghere finas sos chi  - a dolu mannu -  non bi sunt reventidos a nche cròmpere. Unu nùmeru orrorosu: 3.600 mortos chirchende·si amparu e unu venidore in aterue.

Turchia. Àteros 6 pipios mortos afogados in mare. Amnesty international denùntziat

de Maurìtziu Sale

Deretos corriere.it, Url imàgine

Ant imbènnidu sas careneddas istrìgiles de bator pipios eris, marinende sena vida peri sas abbas fritas de su mare Egeu. In foras dae sa costera turca de Bodrum. Teniant un'edade intre sos 2 e sos 6 annos. Est cantu at riferidu s'agentzia de imprenta Dogan. In pessu duas oras in antis, agigu prus a nord, a probe de Cesme nd'aiant agatadu àteros duos. Irachenos. Fintzas issos de 2 e de 6 annos. Teniant totus sa giubita sarvagente galu bestida, a su chi narant sos piscadores chi los ant agatados e a sa segura sunt mortos afogados, istasidos dae su fritu e isporados dae su terrore.