 |
| Deretos corriere.it, Url imàgine |
Ant imbènnidu sas careneddas istrìgiles de bator pipios eris, marinende sena vida peri sas abbas fritas de su mare Egeu. In foras dae sa costera turca de Bodrum. Teniant un'edade intre sos 2 e sos 6 annos. Est cantu at riferidu s'agentzia de imprenta Dogan. In pessu duas oras in antis, agigu prus a nord, a probe de Cesme nd'aiant agatadu àteros duos. Irachenos. Fintzas issos de 2 e de 6 annos. Teniant totus sa giubita sarvagente galu bestida, a su chi narant sos piscadores chi los ant agatados e a sa segura sunt mortos afogados, istasidos dae su fritu e isporados dae su terrore.
Baddu comente si nch'ant a èssere agatados a modde. Nch'ant a èssere rutos dae sa barca in movimentu e in mesu a sas boghes e a su tracàgiu de su motore, nemos s'at a àere abbigiadu s'iscumparta issoro. Momentos de trùbulu, de anneu e - a su matessi tempus - de ispera, sos de sos emigrantes. Baddu si sos babbos e sas mamas issoro si nde sunt sapidos deretu o si nche l'ant a àere iscobertu a trigadiu cun totu su chi li pigat a sos majores cara a disacatos de custa genia.
Amnesty International denùntziat. Su raportu publicadu oe chistionat craru. Narat chi, in parallelu, sa Turchia est a un'ala retzende dinari dae Bruxelles pro amparare sos emigrantes e a s'àtera est firmende·los, arrestende·los e serrende·nche·los in tzentros de detentzione. In ue los minetzant, los iscudent e los custringhent a si nche torrare dae ue sunt bènnidos. Podet èssere in Sìria o in Iraq. A ue fuent, però giai l’amus bidu. Oramai - sighit su raportu - sos mèdios de comunicatzione parent bulletinos de gherra e belle nemos càrculat prus sas acontèssidas che a sa de custa note comente a una noa. E su pesu chi s'imprenta internatzionale a bias li dat est semper menguende a sos ogros de chie leghet.
Gasi comente est creschende imbetzes su nùmeru de sos mortos, gasi comente sunt isvanessende sas isperas, chi si pesant in fumu e nche perdent die cun die sa balia issoro. Cara a sa morte subitana de unu pipiu, non bi nd'at ispera, non b'at resone, non b'at consolu. E mescamente non b’at càrculu, non b'at tratativas chi bàgiant. «Duncas Bruxelles est - a su chi si leghet galu in su raportu de sa ong - pro nois, responsàbile e còmplitze de sa Turchia in violatziones sèrias de sos deretos umanos.E sas tratativas intre Ue e Turchia devent èssere serradas cantu prus in antis».
Su Nadale est sa festa de unu pipiu e de totu sos pipios. In belle totu su mundu. Ma su Nadale no est su matessi pro totus. Podet àere unu sentidu universale, ma a sa segura tenet declinatziones diferentes. Podet èssere unu bìculu, un'ispera de lughe e de cunfortu pro unos cantos, ma una lantza, unu frullana niedda e arrodada pro àteros.
