 |
| Deretos Reuters. Url imàgine |
Sa barca si nch’afundeit su mese de abrile de su 2015 e a como resurtat su naufràgiu prus mannu de su mediterràneu. Eris, a prus de un'annu dae sa disaura, sa marina italiana nch'at acabbadu sas operatziones de recùperu de sos corpos.
Duas chidas a oe nch’aiant tramudadu s'iscafu dae su fundale de sa Lìbia a su de sa Sitzìlia pro nche pòdere bogare totu sas vìtimas e dare·lis un’interru dignu. In s'iscafu nch'aiat 458 pessones (pagu prus o mancu àteras 200 in foras). Sos 348 operadores chi sunt intervènnidos in sas operatziones ant riferidu chi b'aiat chimbe persones pro cada metru cuadru ammuntonadas a pitzu de pare. Una cosa impressionante.
Sa barca si nche fiat trotulada pro chistiones de echilìbriu e de pesu. Sos passegeris chi fiant in su ponte si nche moveint totus a un'ala pro pedire agiudu a unu mercantile chi fiat colende, ma s'ispostamentu lis at fatu brulla mala, ghetende·nche·los a modde. S'iscafu afundeit in pagu tempus.
Como at a cumintzare una de sas fases prus dìligas. Un'iscuadra sientìfica at a chircare de identificare cantas prus vìtimas possìbile, in manera de nche las pòdere insertare in un'archìviu de datos chi at a pòdere èssere consultadu dae sos familiares pro su reconnoschimentu.
