In die de oe | Tenerife 1977: degollu aèreu sena mancu decollu

de Maurìtziu Sale

Tenerife 1977: su momentu de s'imbudada - Deretos laopinion.es

Ìsulas Canàrias, aeroportu de Los Rodeos, 27 de martzu 1977 a sas 17:06:56 oràriu tzentru-europeu. Un’aèreu americanu, Boeing 747 bolu Pan-Am 1736 fiat rodiende subra de sa pista in fatu a un’aèreu olandesu, semper unu Boeing 747, bolu Klm 4805, conca a su giassu de decollu. Ambos pilotas fiant prus chi non cumbintos chi sa pista esseret lìbera. Ma unu no ischiat de s’àteru. Su pilota olandesu, pro una malecumpresa cun sos operadores de sa turre, a cajone paret de sas trasmissiones istorbadas dae su tempus malu e dae unu limbàgiu tècnicu ambìguu penseit chi sa pista esseret bòida, si leeit su bia lìbera e nch’issendeit s’aèreu, a velotzidade màssima conca a su decollu. Ma sa pista non fiat lìbera, in dae in antis bi fiat su Pan-Am. Bi fiat sa nèula e unu muntone de fatores chi non permiteint a su pilota olandesu de istransire su corfu.

Si nch'est mortu Johan Cruyff, su “Pelè arvu”

de Màuru Piredda

Deretos Wikimedia. Url imàgine

Si nch'est mortu oe, a s'edade de 68 annos, Hendrik Johannes Cruijff, est a nàrrere su "profeta de su gol", su "Pelè arvu". Giogadore e allenadore de s'Ajax, de su Bartzellona, de sa natzionale olandesa, Johan Cruyff (gasi dd'iscriiant su nùmene suo su bonu de is bortas) fiat s'intèrprete prus rapresentativu de su "fùbalu totale". Cruyff at conchistadu tres botzas de oro (1971, 1973, 1974) e, pro pagu, non bincheit su mundiale de su '74 in Germània. In su tacuinu suo ddoe at finamentas 3 Copas de is campiones gioghende cun is lantzeris biancu-rujos de Amsterdam (1970/71, 1971/72, 1972/73) e una allenende su Barça (1991/1992). Petzi àteros chimbe isteddos de su fùbalu sunt renèssidos a dda bìnchere in campu e in panchina (Miguel Muñoz, Giovanni Trapattoni, Josep Guardiola, Frank Rijkaard e Carlo Ancelotti). Cun is blaugrana, a su chi aiat naradu sa vigilia de sa finale contra a su Milan (faghende·si fotografare cun su trofeu), nde deviat bìnchere un'àtera in su '94, ma is ruju-nieddos (duas retes Massaro, una peròmine Savicevic e Desailly) ddu lasseint a manos iscutas. S'eredade sua dda regolleit Marco Van Basten: intradu in campu in càmbiu de "su profeta", su 3 de abrile de s'82 cun sa màllia de s'Ajax, marcheit sa prima rete sua. Finas a como, in fatu a Pelè, abarrat su segundu mègius giogadore de su de XX sèculos.

Àmsterdam-Parigi, 15 segundos de terrore

de Lisandru Beccu

Reuters

Eris un'òmine cun unu Kalashnikov at isparadu in unu trenu cun 550 pessones chi fiat tzuchende cara a sa capitale frantzesa. Sa sorte at chertu chi in su matessi vagone b'aeret duos militares americanos in litzèntzia, chi sunt renèssidos a intervènnere resurtende a nche lu blocare, in antis chi fagheret degòlliu.