de Lisandru Beccu
 |
| Reuters |
Eris un'òmine cun unu Kalashnikov at isparadu in unu trenu cun
550 pessones chi fiat tzuchende cara a sa capitale frantzesa. Sa sorte
at chertu chi in su matessi vagone b'aeret duos militares americanos in
litzèntzia, chi sunt renèssidos a intervènnere resurtende a nche lu
blocare, in antis chi fagheret degòlliu.
S'òmine, unu
pitzocu de 26 annos, fiat biagende issu puru cara a Parigi cando, in
gosi, nch'at bogadu s'arma e at cumintzadu a isparare a s'isfaddida. A
sa prima ogriada calicunu at pensadu chi su fusile esseret unu giogu, ma
a sos tzocos e a sos bidros chi fiant falende·si in chisina, totus si
sunt pesados a boghes e ant chircadu de si pòdere amparare. Deretu sunt
intervènnidos sos duos militares chi l'ant trobeidu in terra.
Sunt
istados 15 segundos de timòria pro totus, ca bi podiat mòrrere unu
muntone de gente, imbetzes b'at petzi duos fertos. A pustis, su trenu
s'est firmadu in Arras, in ue sa politzia at arrestadu su
malintentzionadu; l'ant compidadu e ant bidu chi giughiat un'àtera
pistola automàtica cuada. In su mentres ant sucursu sos fertos e sa
Rughe Ruja at donadu s'abba a sos passigeris assuconados.
