 |
| deretos Cuba Informacion |
Su terrorista e ex-agente de sa Cia Luis
Clemente Faustino Posada Carriles alias Bambi, nch'est ricoveradu in
s'ospidale a cajone de un'intzidente istradale chi at àpidu in Miami
(Iua). Carriles est connotu in logu nostru pro duas resones: fiat su
mortore de Fabio Di Celmo in su 1997 e mescamente ca dae su 1976 fiat
unu de sos membros de sa "operatzione Gladio" (nàschida a bisu de sos
ideòlogos pro defensare s'Europa dae un'invasione soviètica) chi si fiat
evòlvida in Itàlia suta su controllu de duos de sos polìticos italianos
prus ambìguos e potentes: Frantziscu Cossiga e Giulio Andreotti.
Istende a su chi si leghet, paret chi bi benneret a s'ispissu a Sardigna
mescamente a curtzu de s'Alighera, a Cabu Marràrgiu. E non pro mirare
sa bellesa de sa costa sarda o pro istudiare sa cultura isulana, ma pro
àteras resones iscurigosas chi Indro Montanelli e Mario Cervi
cunsideraiant prus chi non lìtzitas e fintzas netzessàrias pro
s'istabilidade de s'Itàlia e de s'Europa in sos annos caentes de sa
gherra frita (si m’est cunsentidu su paradossu mancu meda befulanu si
pensamus a totu sas acontèssidas de su tempus).
Fiant annos in
ue, a Carriles, si li podiat atribuire a su nessi unos deghe atentados
terrorìsticos cun mortos e fertos in totue: Portugallu, Costarica,
Giamàica, Colòmbia. Su chi l'at singiadu a fogu sa carena, però est
istadu s'atentadu a su grupu cummertziale aèreu "Cubana de Aviacion".
Una bomba posta in intro de un'aèreu, a banda de sa coa, chi fiat
esplòdida in bolu subra de sas ìsulas Barbados cajonende sa morte de 73
passigeris tziviles . Sa die bi fiat fintzas s'iscuadra intrea de sos
giòvanos cubanos de s'ischerma.
L'aiant protzessadu e cundennadu in
Pànama in ue però, aiat retzidu deretu s'indultu dae sa presidente
Mireya Moscoso e si nche fiat cuadu sena iscontare pena peruna in sos
Istados unidos. E dae tando at semper traballadu dae palas de sa
muridina de sa Cia. Eris unos cantos informadores ligados a s'ambiente
mafiosu cubanu e nordamericanu, ant isparghinadu sa noa chi sa màchina
in ue nche fiat Carriles esseret sighida dae a curtzu. E non dae sa
giustìtzia paret, ma dae sicàrios de sa matessi cunfraria.
