de Màuru Piredda
In die de oe sos frantzesos voteint su presidente issoro su 2007 e su 2012. In ambos sos ballotàgios su disafiu fiat intre sos sotzialistas e sos gollistas de s'Ump. Su 2007 bincheit Nicolas Sarkozy contra a Ségolène Royal. Sarkozy cumintzeit a pigare nuscu de Eliseu durante sas pesadas de sos apendìtzios pariginos (pro issu b'aiat“canàllias” de nch'ispèrdere ebbia), una borta sètzidu in s'iscrannu torreit a nch'acurtziare sa Frantza a sos Istados unidos a pustis de sa parèntesi Chirac. Cajoneit grandu arrennegu intre sos traballadores cun sa proposta sua in contu de pensiones. In su 2011 mustreit a su mundu sa mannosia frantzesa cun s'interventu in Lìbia. Ma perdeit contra a François Hollande, chi de Ségolène Royal fuit su cumpàngiu. Ma de sotzialismu nemmancu s'umbra. Peruna furriada a manca in contu de interventos militares (Mali, Repùblica tzentru-africana) e disìgios de nch'artziare sa Frantza a potènzia mundiale pedende gherra contra a sa Sìria de Assad. In economia sa sua non fiat pro seguru una polìtica de manca e, pro su chi pertocat s'atzione interna, torreit a balangiare cunsensos a pustis de sos assàchios islamistas de su 2015. Ma a contos male fatos si bi torrat. Sos sotzialistas (e gasi etotu sos gollistas) non crompent a su ballotàgiu de su 2017 lassende campu lìberu a Emmanuel Macron e a Marine Le Pen.
