Sas pessones chi costumant a papare màndigos aprontados in domo ant prus pagu possibilidades de s'ammalaidare de diabete de tipu 2. In sìntesi sunt custos sos resurtados de una chirca de s'Harvard T.H. Chan School of Public Health de Boston. Chie cheret aprofundire si los podet lèghere in sa rivista Plos Medicine.
In totu su mundu, siat pro sos ritmos e siat pro sa mandronia a coghinare, pessones meda sunt avesas a papare in foras de domo, faghende ricursu, a su sòlitu, a sos màndiga lestru (fast food in inglesu). Dietas ricas de energia ma pòberas de sustàntzias nutritivas. S'ipòtesi est chi custa genia de cumportamentu nche giugat sas pessones a un'aumentu de su pesu, faghende crèschere fintzas s'arriscu de isvilupare su diabete de tipu 2.
Analizende sos datos, sos sientziados ant iscumproadu chi sas pessones chi papant prus a fitianu in domo ant un'arriscu prus bàsciu de su 15% de isvilupare su diabete de tipu 2 cunforma a chie màndigat in foras.
