 |
In su giru de pagu tempus, fintzas sos utentes comunos de sos sitos sotziales no ant a dèvere prus pònnere su ligàmene de un’artìculu o de su blog issoro pro lu cumpartzire, pro nàrrere, in facebook o in twitter. B’ant a pessare sos sitos (sotziales) matessi a si nche l’incamerare a sa sola e a lu publicare.
Est de importu duncas a avisare. A pònnere in parte a totu sos chi – e sunt a beru medas – pensant de ischire cada cosa. Sos chi, a bisu issoro, paret chi non b’apat peruna trampa a ue nche potzant rùere, cumbintos comente sunt de sa connoschèntzia issoro. Mescamente sos chi tenent un’assentu distacadu pro non nàrrere de superioridade in sos cunfrontos de sa tecnologia e pròpiu de sos sitos sotziales.
Dae como in susu tocat chi diant cara. Sos sitos sotziales non sunt unu gioghitu pro disabudos o oreris de cada casta. Non sunt ainas pro colare ora de badas. Su Web est una cosa sèria, de leare in cunsideru, in ue meledare a manera funduda e cun àsiu. E pertocat a totus. Dae sos chi “…ma deo non tèngio mancu a Internet!” finas a sos chi non ant abertu mai unu contu in Facebook. E fintzas a chie, in domo, non tenet mancu s’elaboradore o sa televisione.
Pròpiu gasi. De André, giai dae su ’68, cantaiat «Per quanto voi vi crediate assolti, siete lo stesso coinvolti». Ma, pongiamus agigu de òrdine. Google no est un’entziclopedia o una banca de datos de su mundu nostru; no est un’aina chi nos illèbiat sa cherta de su chi nos ocurret. Nono. Google est un’azienda e no est neutrale. Pro nudda.
No est, in finitias, ne unu maistru, ne unu tutore postos in cue pro nos ghetare manu in su caminu rebestu de sa connoschèntzia. E no est mancu una garantzia de veridade, de sabidoria o de echilìbriu. Tenet un’àtera punna, faghet un’àteru mestieri: su de disinnare cales sunt sas connoschèntzias e sas informatziones de nos dare.
Unos cantos annos a oe, unu grandu espertu - forsis su prus espertu a livellu mundiale - de Internet e de su mundu cuadu de sa rete, Siva Vaidhyanathan, professore de Sièntzia de sa comunicatzione in s’universidade americana de sa Virginia, at iscritu unu libru. “The Googlization of Everything (And Why We Should Worry)”. [Sa gugolizatzione de totu(E pro ite nos diamus dèvere oriolare) nda]
Fìamus in su 2012 e - mancari nch’apat coladu pagu tempus - sas cosas non fiant che a oe. Google detzidiat, mustraiat resurtados, manteniat in segundu pranu o cuados sos chi cunsideraiat prus pagu interessantes (o chi non li daiant perunu profetu econòmicu) e detzidiat duncas su chi devìamus ischire. Detzidiat issu, non nois. Ma, a su tempus, su mundu de Internet fiat galu orizontale. Fiat unu mundu in ue biviant totu sos utentes chi teniant sa possibilidade de si connètere e chi cheriant proare una manera noa pro s’informare.
Su Web orizontale funtzionaiat comente a su gràmene. S’erba chi impestat sos campos finas oe. Chie non connoschet su gràmene? Creschet in totue. Non timet nen fritu, nen caente. Nen pedra, nen ludu. E si pigat su logu caminende pròpiu in orizontale. Sos campos de gràmene sunt grezos, inùtiles e malos a ispèrdere. Google est su gràmene.
Funtzionat galu oe cun su sistema de sos ligàmenes. Iscriimus unu nùmene. Google nos rispondet e nos dat contos de cussu nùmene. In intro a sa risposta però, agatamus unu ligàmene chi, incarchende·lu, nos nche tragat a aterue. E in aterue agatamus un’àteru ligàmene chi nos nch’imbiat galu a aterue. E gasi sighende. Si podet dare chi nois, chirchende, movamus dae Albert Einstein e nche crompamus a sas Domos de janas. Custu est su mètodu orizontale. E custu est s’algoritmu de Google. Algoritmu tramperi, ma chi nos lassat galu agigu de tretu pro seberare.
