 |
| Deretos Reuters/M.Torokman URL imàgine |
Hanan Al Hroub at bìnchidu su nobel pro s'iscola 2016. Ma ite est custu prèmiu? Chie est Hanan Al Hroub? E pro ite at bìnchidu issa ocannu?
In inglesu li narant Global Teacher Prize (Prèmiu Globale Maistru). Est ammaniadu, annu cun annu, dae sa Fundatzione Varkey, un'organizatzione sena punnas de balàngiu istituida pro megiorare sos istandard de istrutzione pro sos pipios isvantagiados de totu su mundu. E est a disponimentu pro totu sos maistros chi s'annòditant pro cumpetèntzia e capatzidade in s'annestru de sos pipios chi tenent dificultades de cada casta. Pipios, su prus pòberos, dèbiles, disamparados, chi bivent in cunditziones de misèria a cajone de cunflitos tziviles, a cajone de gherras e de àteras acontèssidas violentas.
Hanan Al Hroub est nàschida e crèschida in unu campu de pròfugos palestinesu, in Betlemme e at connotu annos e annos de violèntzia. At bìvidu die cun die a costàgiu de assàchios sena resone aparente. Sende crèschida in unu cuntestu che a custu, como lutat pro mudare s'istadu de sas cosas, impreende s'ùnicu mèdiu chi connoschet e chi, cun su tempus, at imparadu a maniestare cun profetu: s'istrutzione. «Cherimus petzi sa paghe. Cherimus chi sos pipios nostros nche potzant barigare sa pipiesa in paghe». A su chi si leghet in Orizzontescuola, Hanan at a impreare su prèmiu, unu millione de dòllaros, pròpiu pro cumbàtere sa violèntzia: «Ca devimus inditare a sas criaduras chi sas ùnicas armas nostras sunt sa connoschèntzia e sa bonintrànnia».
Su maridu de Hanan Al Hroub l'ant fertu unos cantos sordados israelianos pròpiu suta sos ogros de sos fìgios:«Sos pitzocos - si leghet galu in Orizzontescuola - non bi reventiant prus a istudiare, a giogare, a mandigare. Dae sa die, fiant semper serrados in intro de domo galu assustados dae s'isparatòria. E tando issa, Hanan, at pensadu chi deviat devènnere sa maistra issoro».
Su mètodu suo est basadu subra de su giogu, de sa cunfiàntzia, de sa collaboratzione e de su rispetu. Sa maistra binchidora ànimat sos dischentes suos pro chi traballent totus in pare. E est pròpiu custu assentu chi at menguadu sas cundutas violentas in totu sas iscolas chi l'ant adotadu. E dae inoghe est cròmpidu su prèmiu.
