 |
A su chi si leghet in sa chirca publicada dae s'Universidade de Miami, in Flòrida (University of Miami Miller School of Medicine), in sa rivista Nutrition, no est petzi sa fustinaga chi agiudat a cuntènnere sas patologias de sa vista. A illebiare s'istrachidùdine de sa rètina e de s'ogru in generale, b'est fintzas s'àghina. Sa frùtora de Bacchus, prus chi non connota, venerada e tzelebrada finas in Sardigna, agiudat a arressare s'imbetzamentu oculare. Alimentende e amparende sas tzèllulas foto-retzidoras (sas chi rispondent a sa lughe e chi cun sas maladias degenerativas si nche morint crompende·nche a una pèrdida belle totale de sa vista) dae s'òssidu chi s'ingendrat in pare cun sos radicales lìberos (una creze de arga chi tzìrculat in su sàmbene), s'àghina nch'istransit, menguende·las, sas cajones de fartas graes a sa vista e sas probabilidades de dannu in particulare a sa rètina e a su funtzionamentu suo.
Lu dimustrat s'istùdiu chi sos chircadores ant fatu cun casos de degradatzione retìnea in unos cantos sòrighes de laboratòriu. Los ant alimentados pro una trata cun àghina liofilizada, fata a prùere. Dende·bi·nde·lis una cantidade chi currispondet a unas tres portziones sa die pro s'òmine. Una dieta cun tzùcaros suta controllu duncas. E un'àtera imbetzes cun un'alimentatzione normale. Sos resurtados, a pustis de chimbe chidas suta custu regime alimentare, isetende sa rechinta chi òssidat sas tzèllulas, ant evidentziadu chi in sos sugetos aproendados cun s'àghina, siat sa rètina, siat su funtzionamentu suo fiant amparados. In particulare sa rètina manteniat s'ispessore suo, sa cantidade normale de foto-retzidores e una calidade istàbile de s'atividade issoro. A s'imbesse, in sos sugetos alimentados sena s'àghina, sa rètina resurtaiat dannada, perdende ispessore. In prus ant averguadu una mèngua, su 40%, de sos foto-retzidores e una pèrdida marcada de atividade tzellulare.
