.svg/345px-Syria_in_its_region_(claimed).svg.png) |
| Wikimedia |
«Amus agiuadu, sighimus a agiuare e amus a agiuare in su tempus
benidore su guvernu sirianu frunende a s'esèrtzitu suo totu su chi ddi
bisòngiat». Cun custas paràulas su ministru de is afares èsteros
russu, Sergej Viktorovič Lavrov, at cunfirmadu s'impignu de Mosca in
favore de Bashar al-Assad e contra a s'Isis.
Lavrov at annantu chi,
però, non ddoe at nudda de nou cunforma a cantu prevìdidu dae is acordos
bilaterales pretzedentes cun Damascu. Paret, duncas, chi Lavrov apat
chertu isminorigare sa noa de eris de s'agentzia Reuters, publicada
movende dae is decraratziones de tres fontes libanesas.
Dae Washington
ddoe at oriolu pro sa crèschida de s'impignu militare russu in Sìria.
Impignu chi mirat a mantènnere su status quo, in antis chi Assad nce
fhatzat sa fine de su presidente lìbicu Mu'ammar Gheddafi. Non nch'at
coladu dies medas dae cando finamentas sa Frantza e su Regnu unidu aiant
annuntziadu incursiones aèreas contra a s'Isis, ma cun sa punna pagu
cuada de unu càmbiu de regime.
No est de badas chi is Istados unidos ant
pedidu a Iran, Bulgaria e Grètzia de negare su tretu aèreu a is russos
conca a Damascu.
