de Lisandru Beccu
Bruxelles at aprovadu su Psr 2014-2020. S'Unione europea at a leare parte a su gastu totale cun su 48% de sas resursas. Sos milliones chi arribant dae su Feasr (Fundu agrìculu europeu pro s'isvilupu rurale) sunt prus de 628. Un'àteru 36,4% l'at a pònnere a disponimentu s'istadu italianu (476 milliones) e su 15,6% sa Ras (204 milliones).
Est abarrada cuntenta s'assessore de s'Agricultura Elisabetta Falchi chi at naradu: “Dae oe sos massajos e sos pastores nostros ant a àere a disponimentu un'istrumentu de programmatzione chi los acùrtziat a resursas finantziàrias de importu, chi ant a permitere de pòdere megiorare sas produtziones e sa cumpetitividade de sas impresas. Su Psr nostru at retzidu cummentos positivos meda dae sos tècnicos europeos cun sos cales amus arresonadu pro un'annu intreu. Ant bidu in su progetu nostru su rispetu de sas diretivas de s'Ue pro su chi pertocat isvilupu e innovatzione”.
