A pustis de sa pàusa pro sas partidas de sas natzionale, su campionadu de Sèrie A torrat a cumintzare cun su disafiu intre Inter e Casteddu. Sas iscuadras sunt a sa de noe e a sa de deghe positziones in classìfica, a distàntzia de unu puntu.
16/10/16
15/10/16
Tàtari: istudiantes e ativistas blocant su seminàriu de sa Marina
de Lisandru Beccu
Giòvia unu grupu de istudiantes e de ativistas de sos movimentos contra a s'ocupatzione militare at invasu s'àula Mossa de su dipartimentu de Lege de s'Universidade de Tàtari. Su seminàriu, “Introduzione alla Cybersecurity”, no at fatu in tempus nemmancu a cumintzare chi sos ativistas, a sa lestra, ant leadu sa paràula e ant isboligadu unu lentzolu de protesta in ue b'aiat iscritu: «Fuori la guerra dall'università».
14/10/16
Istudiantes in protesta contra a sas tarifas noas de s'Arst
de Lisandru Beccu
 |
| Deretos lìberos |
Sunt sighende dae carchi die sas protestas contra a sas tarifas noas de s'Azienda regionale sarda de trasportu (Arst). Dae sa Baronia a sa Barbàgia finas a su Màrghine creschet su mùtria mala pro sos sèberos de sa Regione in contu de trasportos. Sos istudiantes de sa provìntzia de Nùgoro però, a s'ala issoro, tenent fintzas su sustegnu de sos genitores e de sos amministradores pùblicos.
13/10/16
Tempus malu, cras sunt prevìdidas temporadas e gràndine
de Lisandru Beccu
Su servìtziu meteorològicu regionale at annuntziadu chi in sas oras imbenientes, in Sardigna, b'at a àere unu peoramentu de sas cunditziones climàticas. At a pròere pagu prus o mancu in totu su territòriu de s'ìsula e sos fenòmenos ant a tènnere caràtere de temporada cun lampos, gràndine e bentu, a bias fintzas forte. Ant a èssere interessados mescamente sos setores de sa Sardigna setentrionale e de sa Sardigna de mesu. Petzi a banda de note su tempus at a megiorare.
Semplificatzione, su Consìgiu regionale narat chi emmo. Rivolutzione feminile in su limbàgiu amministrativu
de Màuru Piredda
 |
| Deretos Ansa. Url imàgine |
Su Consìgiu regionale sardu at aprovadu su progetu de lege presentadu dae sa Giunta in contu de semplificatzione e amministratzione pùblica. Su provedimentu «introduit - est su chi leghimus in su comunicadu ufitziale de sa Regione - unu sistema de programmatzione de sas atividades de semplificatzione; indivìduat istrumentos pro megiorare sa calidade de sa regulamentatzione; istabilit normas subra de su protzedimentu amministrativu pro nde ridùere sos tempos; istituit su Suape, isportellu ùnicu pro sas atividades produtivas e pro s'edilìtzia; introduit unas cantas mesuras pro semplificare protzeduras amministrativas de setore». Sa punna diat dèvere èssere sa de nch'eliminare prus de 300 provedimentos emanados intre su 1949 e su 1969 e sa de aunire sas cumpetèntzias, finas a oe partzidas, intre sos isportellos Suap e Sue. Novidades finamentas in su limbàgiu amministrativu: ruolos e professiones ant a dèvere cumbinare cun su gènere de sa persone, siat issu òmine o fèmina. Duncas amus a àere sa sìndiga, s'assessora, sa presidente e gasi sighende. Una manera de nche barigare una nomencladura androtzèntrica chi no est petzi de màdrighe linguìstica ma finamentas, e mescamente, culturale-maschilista. Abarrat su problema de sos plurales ca bastat un'òmine in un'assemblea ipotètica de sìndigos tinta a rosa pro chi non siat un'assemblea de sìndigas. E abarrat su problema de unu Consìgiu belle monosessuadu.
12/10/16
Salah Abdeslam abarrat sena avocados
de Lisandru Beccu
S'ùnicu atentadore chi est subravìvidu a sos atentados de Parigi, in su mese de santandria de su 2015, at a abarrare sena defensores legales. L'ant annuntziadu sos avocados suos in un'intervista a s'emitente Bfmtv.
«Nois ischimus e nde semus cumbintos, ca nos l'at naradu, chi no at a faeddare e at a ricùrrere a su deretu de abarrare a sa muda. Ite cherides chi fatzamus? L'aìamus giai naradu dae sa prima die chi si s'assìstidu nostru no aeret faeddadu nois no lu diamus àere defensadu prus». Custas fiant sas paràulas de Sven Mary e de Frank Bertos, sos legales de Salah Abdeslam.
S'imputadu frantzesu est acusadu de àere fatu parte de s'iscuadra de assàchiu chi ochieit 130 persones, in Parigi, sa note de su 13 de santandria. Dae su 27 de abrile nch'est inserradu in una presone a sud de sa capitale frantzesa, in isolamentu, e est vìdeo-bardiadu 24 oras subra de 24.
Iscriviti a:
Post (Atom)