 |
| Deretos lìberos |
Sunt sighende dae carchi die sas protestas contra a sas tarifas noas de s'Azienda regionale sarda de trasportu (Arst). Dae sa Baronia a sa Barbàgia finas a su Màrghine creschet su mùtria mala pro sos sèberos de sa Regione in contu de trasportos. Sos istudiantes de sa provìntzia de Nùgoro però, a s'ala issoro, tenent fintzas su sustegnu de sos genitores e de sos amministradores pùblicos.
Su problema printzipale est rapresentadu dae sa crèschida de sos prejos de sos billetes, ma sa protesta pertocat fintzas s'adeguamentu de sos mezos chi, in paritzos casos, nch'ant barigadu sos binti annos.
S'est ischierada in favore de sos biagiadores e de sos istudiantes fintzas sa setzione nugoresa de Libe.r.u. narende chi «custa situatzione si cunfigurat comente un'atacu a su deretu de istùdiu e a sa mobilidade pro totu sos abitantes de sa Sardigna de mesu chi, die cun die, si sunt abbigende chi lis est minimende sa capatzidade de pòdere impreare sos servìtzios primàrgios».
Fintzas in su Màrghine sos amministradores si sunt mòvidos conca a s'Assessoradu de sos trasportos pro faeddare cun Deiana. Intre sas àteras cosas ant tocadu sos puntos chi pertocant su riprìstinu de sos abbonamentos pro sos istudiantes universitàrios e sas frecuèntzias oràrias de sos mezos dae e pro Macumere.
S'assessore at giai naradu chi s'at a impignare, ma amus a bìdere si a sas paràulas ant a sighire sas fainas.
