Giòvia unu grupu de istudiantes e de ativistas de sos movimentos contra a s'ocupatzione militare at invasu s'àula Mossa de su dipartimentu de Lege de s'Universidade de Tàtari. Su seminàriu, “Introduzione alla Cybersecurity”, no at fatu in tempus nemmancu a cumintzare chi sos ativistas, a sa lestra, ant leadu sa paràula e ant isboligadu unu lentzolu de protesta in ue b'aiat iscritu: «Fuori la guerra dall'università».
A pustis de àere pigadu su micròfonu, su rapresentante de su grupu at ispiegadu sas resones de su blitz. In su matessi tempus sos àteros ant distribuidu unu fògiu chi, intre sas àteras cosas, leat positzione contra a su sistema universitàriu de militarizatzione de sas dinàmicas tziviles.
S'acordu intre Universidade de Tàtari e Marina militare l'aiant firmadu s'ammiràlliu Ruzittu e su rapresentante de s'Universidade prof. Montella. Sa collaboratzione, formalizada in Sa Madalena, su 24 de làmpadas, previdet, a su chi narat unu comunicadu de s'Ateneu in manera generale meda, sa formatzione universitària e post-universitària e s'isvilupu de atividades de chirca in s'àmbitu de progetos pro sa seguresa e pro sa defensa.
