Su 22 de martzu, a sas 22.35, in TV3, Televisione de Catalugna, est cumentzadu “Katalonski”, unu programa presentadu dae Halldor Mar, musitzista islandesu residente in Bartzellona dae prus de 25 annos S'artista biàgiat a logos diferentes de su mundu addobiende gente chi, mancari non siat nàschida in Catalugna, at imparadu su catalanu.
B’at unas 12.000 pessones in su mundu chi non sunt catalanas però faeddant su catalanu: dae Tzile a Giapone, dae Cànada a Austràlia sunt in medas sos chi no ant catzigadu mai sa terra de Catalugna ma chi connoschent bene sa cultura e chi a imparare su catalanu lis at cambiadu sa vida. L’ant fatu pro resones diferentes: chie pro amore, chie pro passione, pro curiosidade, pro interessu iscientìficu, chie pro sa gana de connòschere.
A custas pessones, sa produtzione de su programma las at mutidas “Katalonskis” e su musitzista islandesu Halldor Mar, in sas trèighi puntadas de su programma, las at a iscobèrrere viagende a sos Paisos issoro e nd’at a cumpartzire paris sas dies, sos momentos galanos e sas passiones.
Ma ite cheret nàrrere su tìtulu de su programma? “Katalonski” cheret nàrrere catalanu in polacu, bùlgaru, bosnìacu, bielorussu in serbu e finas in croatu.
Halldor cheret connòschere custos istràngios che a isse chi, sena bìvere in Catalugna, allegant e pensant cada die in catalanu e dae sos paisos issoro sunt interessados a su chi est capitende in sa terra de Lluis Company.
