 |
| Deretos: www.sardegnaambiente.it |
“S'ae de Bonelli at a torrare a bolare in Sardigna”: a nde dare nùntziu est su situ de SardegnaForeste chi contat de su progetu Life “Aquila a-life” (LIFE16 NAT/ES/000235). Custu traballu punnat a ismanniare sos logos de su Mediterràneu otzidentale in ue custu rapatze potzat istare, chirchende de recuperare un'ispètzie chi arriscat de si nch'ispèrdere.
Su progetu, coordinadu dae sa ONG ispanniola GREFA (Grupo para la Rehabilitación de la Fauna Autóctona y su Hábitat), naschet dae una cunventzione de Agentzia Fo.Re.S.T.A.S. cun ISPRA, firmada su 16 de martzu de su 2018, unu traballu de chimbe annos, comintzadu s'annu coladu, chi at a tènnere fintzas collaboradores frantzesos e ispanniolos. S'ae de Bonelli, iscumparta dae Sardigna in sos annos '80 de su 1900, duncas, at a pòdere torrare a bolare pro more de sa liberatzione de 25 esemplares chi benint dae sos allevamentos ispanniolos e frantzesos cun sa tècnica de s'hacking in intro de una bolera de ambientamentu.
S'operatzione, dìliga meda, at a èssere fata dae sos tècnicos ispetzializados de s'Agentzia Fo.Re.S.T.A.S., paris cun sos collegas de GREFA e de s'ISPRA. Unu de sos logos in ue at a èssere liberada est su Parcu Regionale de Tepilora, chi sighit a mustrare totu sos profetos chi unu territòriu nde podet giùghere a tènnere unu Parcu: logu chi atraet finantziamentos e economia, ma fintzas progetos eco-sustenìbiles chi mirant a su turismu ambientale, esperientziale e escursionìsticu, capatzos de ponnerent in pare natura e isport, cultura e gastronomia, privadu e pùblicu.
