Su Guvernu de Catalugna at dedicadu su 2018 a Pompeu Fabra, su linguista e grammàticu catalanu prus famadu, ca ocannu s'ammentant sos 150 annos dae sa nàschida sua e sos 100 annos dae sa publicatzione de sa "Gramàtica catalana".
Intre sas atividades prevididas in memòria de "s'iscientziadu" chi at codificadu e annoadu sa limba catalana b’agatamus sos "Dictats Fabra", una regorta de 207 detados in lìnia, ùtiles pro connòschere curiosidades de sa vida e de s'òpera de su Maistru e dominare dòighi aspetos ortogràficos (apòstrofu, vocalismu, atzentos etz.).
Dae cando sunt in lìnia, sos detados ant àpidu prus de unu millione de vìsitas e duos milliones de visualizatziones.
Sos impitadores podent seberare sos detados cunforma a su livellu de connoschèntzia de sa limba (dae su livellu B1 a su livellu C2) o podent seberare sos aspetos ortogràficos chi cherent megiorare.
In su situ dedicadu a custa initziativa b'at fintzas una ghia didàtica chi tenet sa punna de agiudare sos dischentes a fàghere sas atividades cun profetu.
