B'at galu tempus, totu su mese de martzu, pro pòdere pigare parte a s'initziativa "Unu libru in donu" promòvida dae sas "Fèminas lìberas in luta pro su deretu a sa salude". Su grupu, sustènnidu dae chimbe librerias tataresas e dae una de Portu Turre, est traballende pro chi b’apat una biblioteca in su Ricòveru diurnu oncològicu (su "Day hospital") nou de Tàtari.
«A chie nos cheret sustènnere - ant naradu sas ativistas Annalisa Ciani, Pierina Cilla e Luana Farina - li pedimus de nos donare unu libru, mègius si comporadu a nou in sas librerias chi, semper sensìbiles e solidales, nos sustenent fintzas in custa initziativa. Sos librajos ant a pònnere a disponimentu sa professionalidade issoro pro cussigiare su libru prus dèghidu, chi at a èssere finamentas iscontadu. A chie cheret contribuire cun un'ispesa mìnima inditamus sa còmpora de unu libru a cumone cun duas o tres persones. Cherende si podet donare unu libru pighende·lu cada unu dae sa biblioteca personale sua, bastis chi siat in cunditziones prus chi non bonas».
Sas promotoras cussìgiant «su donu de unu romanzu curtzu, contos, antologias de contos curtzos, clàssicos de sa literadura sarda (in sardu e in italianu), Istòria sarda, poesias, istòrias illustradas, biografias, hobbìstica, iscritos minudos de cada genia, in italianu, sardu o àteras limbas. A dae chi in sos ricòveros diurnos sos patzientes b'ant a istare unas cantas oras e non dies, est mègius chi sa letura non nche colet su tempus de sa somministratzione de sas terapias».
E si b'at chie diat chèrrere acabbare sa letura in domo? «In su ricòveru amus a marcare su libru prestadu iscriende in su registru su tìtulu, sa data, su nùmene e su sambenadu de su patziente chi l'at a dèvere torrare a pustis».
A su chi narant sas Fèminas in luta, «sa letura no est un'istrumentu culturale de primore ebbia, ma est finamentas disaogu e evasione, mancari provisòria, dae sos problemas pròpios».
Custas sas librerias interessadas: Messaggerie Sarde, Libreria Azuni, Libreria Dessì Mondadori, Libreria Koinè, Libreria Max 88 e, in Portu Turre, Libreria Koinè.
Ciani, Cilla e Farina abarrant a disponimentu pro retzire sos libros o pro los ritirare dae sos librajos de Tàtari chi sustenent su progetu. «Los amus a cunsignare a su ricòveru, sighende sas modalidades e sas dies cuncordadas cun sa Diretzione Sanitària. A como, nd’amus regortu prus de 300».
Sas promotoras ant lassadu duos nùmeros pro informatziones eventuales e cuntatos: 388 8289614 - 346 0143497.
