Sas variedades de ògiu de olia prus ricas de polifenolos tenent efetos benèficos e podere anti-infiamatòriu e anti-tumorale. S'istùdiu est mòvidu dae s'Universidade de Bari e dae s'iscuadra de su Professore Antonio Moschetta, dotzente de meighina interna de sa facultade baresa.
Sa protagonista de sa chirca est s'olia in totu sas variedades suas e su produtu chi nde naschet: s'ògiu extra-vìrgine. S'iscoberta narat chi cada casta de ògiu de olia est in gradu de ativare determinados genes in s'organismu nostru e duncas, chi cada genia cheret cunsiderada comente un'alimentu diferente.
S'istùdiu, finantziadu fintzas dae s'Airc (Assòtziu italianu pro sa chirca contra su cancru), at punnadu a identificare sos genes e su micro-Rna, responsàbiles de su funtzionamentu de sas tzèllulas infiamatòrias.
«Sa chirca – narant sos istudiosos – at cunfirmadu de su totu chi s'ògiu extra-vìrgine de olia, ricu de polifenolos, faghet bene a sa salude non petzi dae su puntu de vista metabòlicu, ma intervenet fintzas subra de s'istadu ossidativu, in s'infiamatzione e in sa preventzione de s'aterosclèrosi e de su cancru».
Sos benefìtzios sunt cumpartos mescamente in sos voluntàrios sanos e no in sos obesos o cun problemas metabòlicos. Custu cheret nàrrere chi duas cosas sunt de importu: sa calidade de s'alimentu e sa de s'organismu chi lu retzit.
Sa faina rapresentat fintzas unu motivu in prus pro chircare de valorizare, de amparare e de promòvere sos ògios locales e de calidade.
