Su parlamentu catalanu, cun 72 votos a favore e cun 11 votos contràrios, at aprovadu sas concrusiones de sa commissione de su protzessu costituente. In sas votatziones sos ùnicos a votare contra sunt istados sos de Sí que es Pot. Su Psc s'est astènnidu e imbetzes su Pp e Ciutadans si nche sunt essidos dae s'àula.
Como, su passu imbeniente est su de ativare s'assemblea costituente. Sos partidos de majoria sunt giai traballende a sas polìticas sotziales e de su traballu e a sa transitoriedade giurìdica.
In sas dies coladas sa corte costitutzionale ispagnola aiat denuntziadu s'illegalidade de sa detzisione, ma JxSí e Cup ant detzisu de sighire sa martza conca a sa formatzione de un'istadu nou. Su cabu-grupu de su Pp, Xavier Garcia Albiol, at impreadu paràulas graes, abusende fintzas de sa paràula “golpe” e at minetzadu chi sos responsàbiles ant a pagare sas cunsighèntzias. Est firma fintzas sa detzisione de Rajoy chi at giai pedidu unione a sos àteros partidos e recursos pro blocare sa risolutzione.
Su presidente de sa Generalitat, Carles Puigdemont, imbetzes est de totu un'àteru pàrrere e sustenet sa positzione de sos deputados regionales chi ant votadu a favore. Si totu andat bene intro de s'acabbu de su 2017 at a nàschere sa Repùblica catalana.
