 |
| Deretos Valéry Hache, Afp/Getty Images. Url imàgine |
Sa timòria torrat a tzocheddare a sa ghenna frantzesa in sa die nòdida de sa Republique. Eris sero in Nitza, pagu prus o mancu a ora de sas ùndighi, unu càmiu nch'est intradu a un'àrea pedonale carchende·si suta canta prus gente resessiat a agatare in su percursu suo. Una botza iscassiada de 18 tonnelladas currende a 80 chilòmetros a s'ora.
Sas pessones si fiant addoviadas a fiotu in sa passigiada de mare pro si pompiare sos fogos pirotècnicos e pro festare in pare sa conchista de sa Bastìllia de su 1789. Momentos de festa chi si sunt furriados deretu a inferru.
Su càmiu nch'at leadu sena sèberu perunu, pitzinnos, betzos e famìlias intreas. Su bilantzu provisòriu frunidu dae su Ministeru de s'internu faeddat de 84 mortos e 100 fertos, 18 sunt graes meda. Ghiende su mezu, a su chi narant sas autoridades, b'aiat unu franco-tunisinu de 31 annos, ma sa noa no est galu cunfirmada.
S'autista at fintzas isparadu una paja de corfos contra a sa politzia chi fiat intervènnida pro arressare sa cursa de su càmiu. Sos militares ant rispostu a su fogu ochiende s'atentadore.
Su presidente Hollande, in s'ìnteri, at illonghiadu de tres meses s'istadu de emergèntzia.
