de Màuru Piredda
 |
| Erdogan faeddende tràmite Facetime. Url imàgine |
Cun sa noa de sa serrada de sos pontes in su Bòsforu (annuntziada eris a oras de sas 22.00 de inoghe), est comintzada sa trasmissione de sas informatziones relativas a su corfu de istadu chi s'esèrtzitu at chircadu, de badas, de acumprire. Tzocos in pratza de Taksim e in s'aeroportu Ataturk, carros armados, elicòteros, F-16, ordignos contra a su Parlamentu, politzia lealista contra a sordados golpistas, ocupatzione de sa televisione istatale.
Acadessimentos cumpartzidos in tempus reale tràmite sas retes sotziales e cundidos dae unas cantas indiscretziones in contu de regias (cale su ruolu de sa Nato o de sos Iua?), de fuas de Erdogan (a Germània? a Londra? a Qatar?), de punnas (esèrtzitu kemalista garante de sa laitzidade che a àteras bias o ite?). De totu. Ca sos golpes sunt finamentas (o mescamente?) gherras de informatziones.
Crompende·nche a sos concruos, Erdogan nch'est in domo sua e su corfu de istadu «pro re-istabilire s'òrdine democràticu e sa libertade» no est resèssidu. «Ant ordidu un'atentadu contra a s'unidade, a sa solidariedade e sa soberania natzionale. L’ant a pagare». Sunt sos faeddos de su "sultanu" de Ankara. Faeddos chi, a sa segura, ponent a trèmere sos burtzos de chie pagu b'intrat cun custu golpe: est a nàrrere de sos curdos, inimigos istàbiles de s'autocratzia turca. A dolu mannu nd'amus torrare a intèndere e a lèghere.
A livellu internatzionale, sos àteros inimigos paret chi apant pèrdidu cussu status. Pagas dies a primu de s'atentadu islamista de s'acabbu de làmpadas in s'aeroportu de Istanbul, Erdogan aiat "istrintu sa manu" a duos atores istratègicos, pro su chi pertocat s'oriente mesanu: a sos russos (pedende iscusas ufitziales pro su jet abbàtidu in s'atòngiu coladu) e a sos israelianos (gràtzias a sas relatziones diplomàticas, econòmicas e de collaboratzione ratificadas a pustis de annos e annos de cuntierras). Mossas chi (mescamente sa prima) ponent in oriolu sos americanos.
Pro su chi pertocat s'Unione europea b'at de nàrrere chi Erdogan sighit a abarrare un'interlocutore de primore de sa Germània in contu de migrantes. E nemos at cunfirmadu sa fonte militare americana de sa fua de su "sultanu" conca a Berlinu (e de su refudu de sas autoridades tedescas).
S'ùnica cosa chi ischimus est chi, como, Erdogan balàngiat finamentas su sustegnu de Obama. Si podet nàrrere, duncas, chi sa vitòria est sa sua. Nemos lu podet nàrrere cun seguresa, ma chie podet negare cun sa matessi seguresa chi custu golpe nche nascat in Washington? O, pro ite nono, in sa conca de Recep Tayyip etotu?
