Dèximu Mannu est una biddighedda a pagu tretu dae Casteddu. Pagu prus de 8mìgia sunt sas ànimas chi nde carcant sas carreras a fitianu. E nòdida est in contu de crònaca, ca acasàgiat una intre sas bases militares prus mentovadas sas ùrtimas dies. Mentovu nàschidu a cajone de su fatu chi forsis la diant serrare ca sos militares istràngios, tedescos su prus, sunt movende·si·nche a aterue.
Ma a dolu mannu b'at finas àteru chi nche l'at sètzida a caddu de sos giornales sardos e fintzas a cudda ala de mare. Giai in su mese de làmpadas de s'annu in pessu coladu sos mèdios isulanos aiant dadu a intèndere chi in s'istitutu de s'Aias (Sòtziu italianu pro s'assistèntzia a sos malàidos psico-fìsicos), in carrera Carducci, unos cantos operadores teniant una presunta cunduta rebesta cun sos ricoverados. Acanargende·los e fintzas iscudende·los a bias.
Fiat giai suta controllu s'istitutu, dae su 2014 e dae tando sa presèntzia de sa giustìtzia est istada semper prus marcada, sena pasu. Finas oe. Die in ue, cun s'òrdine de su magistradu Liliana Ledda chi est coordinende sas indàgines, 14 operadores de s'Aias ant retzidu un'avisu cautelare de suspensione dae su servìtziu pùblicu pro ses meses. Sa proa làdina e determinante sunt istados sos vìdeos registrados dae sos carabineris. Su prus de su traballu l'ant ghiadu sos ispetzialistas de su Nas (Nùcleu Antisofisticatzione e Salude), ma paret chi sa denùntzia siat mòvida dae unu dipendente de s'istitutu.
A sas 10,30, in Casteddu, in sa sala de imprenta de su Cumandu provintziale, sos carabineris ant a acrarire sos particulares.
