“Pubertet”, s'educatzione sessuale pro pipios in sa televisione natzionale norvegesa

de Màuru Piredda

Pompiende·ddos in Youtube paret chi, cunforma a sa morale chi règulat is trasmissiones nostras, siamus cara a oto filmados produidos dae carchi colletivu antagonista de màdrighe "gender". Mescamente si pensamus chi pro ddos pòdere castiare tocat de nch'intrare a su contu personale de sa prataforma e chi, in antis chi comintzet cada vìdeu, ddoe essit a campu un'iscrita chi avisat carchi tele-ispetadore (sensìbile?) chi ddos potzat ritènnere pagu dèghidos. Ma no est una sèrie de filmados pornogràficos. Est petzi sa versione Youtube de "Pubertet" (pubertade), unu programa trasmìtidu in sa televisione natzionale norvegesa. Educatzione sessuale pro pipios, duncas.

Line Jansrud est una maistra chi, agiuada dae is pitzocos chi prestant is careneddas issoro, ghiat cun seguresa is letziones ammustrende is passàgios dae sa pitzinnia a s'adolescèntzia: is mudadas de sa boghe in is mascritos, sa de su sinu in sas femineddas, de sa natura in ambos, is mestruatziones, su suore chi comintzat a bogare fragu. Ma finamentas s'arretura (simulada) maschile, s'isminorigada de is testìculos a cuntatu cun s'astra, is limbas de duos pitzocos chi si carignant durante su basu (in antis chi Jansrud aprofundat sa chistione basende·si a fundu una tomata mossigada) e su cuntatu fundudu intre su pene e sa vagina pro mèdiu de duas sàgomas, manovradas cun progressione dae sa condutora, chi ddos figurant. E, a coa, su cussìgiu de impreare su preservativu.

Nudda de trasgressivu, petzi una ghia chi dat prus de una risposta a is pregontas chi in cussa fase de sa vida no ant a mancare mai. Totus, sena lìmites de edade, ant pòdidu bìdere sa trasmissione televisiva, is mannos e is minores. E mescamente is mannos in pare cun is minores. E paret chi non ddoe apat àpidu problemas. In Norvègia.