 |
| Deretos Furfur, Url imàgine |
L'at dadu a ischire s'Istitutu sanitàriu natzionale colombianu. Sas pessones contaminadas dae su virus Zika nche sunt cròmpidas a 20.297, contende puru 2.116 fèminas ràidas. Su bulletinu de sa chida colada fiat abarradu a 16.419 casos, contende fintzas 890 fèminas prìngias.
Su virus, cajonadu dae sa puntura de sa tzìntzula, si nch'est ispartzinende a totu s'Amèrica latina. Fintzas s'Organizatzione mundiale pro sa salude at dadu s'allarme e at cunvocadu unu comitadu de emergèntzia. Sa prima die de Freàrgiu s'assemblea at a disinnare sa manera de interventu pro chircare de firmare sa pandemia chi nde diat podet nàschere.
Marcos Espinal, cabu dipartimentu de sas maladias infetivas de s'Oms, previdit chi sos cundidos de su continente americanu ant a èssere pagu prus o mancu intre sos 3-4 milliones. 1,5 milliones petzi in Brasile, su paisu prus interessadu.
