Pàrrere de Màuru Piredda
 |
| Deretos femaleworld.it Url imàgine |
Pro s'artìculu 29 de sa Costitutzione sa famìlia est una «sotziedade naturale fundada subra de sa coja».
Sotziedade naturale. Natura. Cuntzetos bastantes, pro is sustenidores
de sa familìa eterogenitoriale e de cussa ebbia. Imoe lassemus·nche a
banda s'artìculu 2 (in ue si narat chi sunt reconnotos e amparados «is
deretos inviolàbiles de s'òmine, siat che a singru, siat in is
formatziones sotziales in ue s'acumprit sa personalidade sua»), e movamus·nos conca a su primu.
«S'Itàlia - nât chi - est una Repùblica democràtica fundada subra de su traballu».
Si deperemus sighire sa matessi trassa de is sentineddas, de Adinolfi,
de Meloni e de Bagnasco, diamus dèpere nàrrere chi in s'istadu italianu
non ddoe at logu pro is chi litzèntziant e pro is chi no assument. E non
resurtat chi custas pessones pesent abolotu pro custa farta e aprontent
carchi "Job day". Pro su traballu est bastante su primu de maju (finas a
cando cussa fèria no at èssere de impèigu a su Pib).
De prus. Si su ddl Cirinnà diat pòdere «abèrrere is ghennas a s'ùteru in allogu»
(cosa chi no est possìbile in Itàlia, e su ddl non nde chistionat) est
beru chi sa mancàntzia de traballu podet abèrrere is ghennas a chinnas
in foras de sa lege, dae sa fura a su suitzìdiu. Sa diferèntzia intre
custas duas "cunsighèntzias" nch'est totu canta in su soddu. Chie podet
ricùrrere a s'ùteru in allogu? E chie est chi ponet acabbu a
s'esistèntzia sua a dae chi non tenet prus peruna possibilidade de
sighire a bìvere?
Bidimus tando chi si is «impèigos de òrdine sotziale e econòmicu» sighint a limitare «sa libertade e s'agualidade de is tzitadinos» impedende·ddis «s'isvilupu prenu de sa pessone umana»
(artìculu 3.2), non ddoe diant èssere is cunditziones pro chi una
famìlia (mancari eterogenitoriale) si potzat fraigare. E sena
s'istabilidade econòmica sa matessi unione matrimoniale no at èssere
lìbera. Galu prus pagu dd'at a èssere sa disunione, s'isorvimentu de su
vìnculu.
Su bellu de is limbas est chi agiuant a cumprèndere
mègius is protzessos. In sardu "natura" tenet su sentidu suo. Si tando
sa famìlia naturale est sa chi permitit sa re-produtzione e nudda ddoe
diat dèpere àere in foras de custu tziclu, tando est beru chi non ddoe
at logu pro is uniones omosessuales e pro is famìlias omogentoriales. Ma
est beru finamentas chi is corpos de is fèminas nche sunt impresonados e
cundennados a unu destinu e a unu ruolu pre-istabilidu dae sa morale
burghesa e clericale.
E, duncas, chi non ddoe depet àere logu pro un'idea de sotziedade anti-patriarcale e anti-maschilista.
