Pro Rastelli est sa prima partida comente aversàriu in s'istàdiu Partenio, difatis sos ex tifosos suos li riservant frùschios a cantu podent. Sos biancu-birdes campanos sunt in chirca de conchistare unu postu pro leare parte a su nessi a sos isparègios pro nche pigare a Serie A. Su Casteddu imbetzes devet ammustrare chi est de un'àtera categoria ca in sas ùrtimas giorronadas su giogu no at cumbintu meda.
Giai in sos primos minutos sos casteddajos ant sa possibilidade de nche marcare su vantàgiu, ma Joao Pedro si faddit un'ocasione de oro cara a sa porta defensada dae Frattali. S'Avellino imbetzes isfrutat bene sas ocasiones. Dae unu tiru lìberu naschet su gol de s'1 a 0. Paghera nche la ponet in mesu pro sa conca de Castaldo ma sa botza la respinghet su palu. Nudda est pèrdidu, arribat lestru Mokulu e nche la ponet in intro. Sa partida si ànimat e su Casteddu parègiat a pustis de chimbe minutos. Joao Pedro dae su ladus de manca nche ponet in mesu de s'àrea sa botza pro Munari. Su tzentrucampista ruju-biaitu nche la devet petzi arrumbare a intro. Gasi est, 1-1. Primu gol in campionadu pro su giogadore emilianu. Sas iscuadras cumintzant tando a si leare sas mesuras, ma acontesset una cosa chi at a cunditzionare su restu de sa partida. Sbaffo in bator minutos leat duas targhitas grogas e s'àrbitru Pinzani, a su de 25 minutos, non podet fàghere a mancu de nche lu bogare a foras. Avellino in deghe òmines.
Como est su Casteddu su protagonista, chircat de conchistare metros de campu e de isfrutare sa superioridade numèrica. A su de 36 minutos Sau nch'est belle in ie pro nche marcare su vantàgiu, ma su tiru non tenet sorte. Sa botza nch'iscudet a su palu a sa dereta de su portieri e torrat in segus.
In su segundu tempus sos sardos impreant meda sa tàtica de su contratacu. Bi proant Barreca, Di Gennaro e Farias a irmoventare su resurtadu, ma su portieri est atentu in totu sas ocasiones. Sos ruju-biaitos chircant de pùnghere dae su tzentru, isfrutende pagu sas alas laterales. Sa tàtica no est de sas mègius ca sos atacantes casteddajos agatant sa defensa campana semper ischierada.
Melchiorri at un'ocasione a su de 70 minutos, ma su tiru est artu meda. Su vantàgiu de su Casteddu arribat a su de 78 minutos cun Cerri. Farias proat a tirare a porta, ma sa botza, comente in unu fliper, nch'iscudet a sas ancas de una paja de defensore in antis de nche cròmpere a sos pees de s'atacante parmigianu. A sa sola cara a su portieri non si podet faddire. 1-2 pro sos sardos.
Oramai si giogat a una porta. In sos ùrtimos deghe minutos sos òmines de Rastelli chircant in cada manera de nche marcare su de tres pro nche serrare sa partida de su totu, ma sas ocasiones non tenent sorte bona. In sos ùrtimos minutos de recùperu s'Avellino, in chirca de su parègiu, si nch'acherat a sos tretos de Storari, ma sos defensores sardos amparant bene sa porta issoro. Su frùschiu de acabbu de s'àrbitru no istentat a arribare. Sos tres puntos movent conca a Casteddu.
Sos ruju-biaitos nche torrant a su cùcuru de sa classìfica, pro como. Devent ancora giogare totu sas àteras iscuadras. Sa classìfica agiornada, duncas, bi l'amus a àere petzi lunis sero, a pustis de su postìtzipu. Su Crotone, imbetzes, cras a sas tres de sero, at a èssere impinnadu cun su Perùgia.
Formatziones
Avellino: Frattali, Pucino, Chiosa, Jidayi, Biraschi (80' Silva), Gavazzi, Paghera, Sbaffo, Bastien (66' Insigne), Mokulu (36' Migliorini), Castaldo.
Allenadore: Attilio Tesser
Casteddu: Storari, Barreca, Ceppitelli, Salamon, Balzano, Di Gennaro (58' Cirelli), Fossati, Munari, Joao Pedro (63' Melchiorri), Sau (75' Cerri), Farias.
Allenadore: Massimo Rastelli
Gol: 5' Mokulu, 11' Munari, 78' Cerri
Espulsos: 25' Sbaffo
