 |
| Deretos Pixabay.com URL imàgine |
Su raportu Msf publicadu e difùndidu eris, lunis 18 de ghennàrgiu, chistionat de fallimentu. De derrota cumpleta. Acrarit cun particulares de gherra atòmica, su chi est acontèssidu e galu est acontessende a sos migrantes, a sos chi rechedent asilu e a totu sos pròfugos cròmpidos a Europa in chirca de ispera. Faeddat de derrota, de disacatu, de disaura. Analizende su fenòmenu pro su chi pertocat su traballu issoro, sos mèigos sena làcanas, ant decraradu chi su 2015 est istadu un'annu de terrore, de morte e de suferèntzia sena mesura. Unu drama in ue s'Unione europea at dimustradu totu sa debilesa sua e sas fartas de unu sistema de acollièntzia e de acasàgiu sena règulas, sena critèrios. Nen polìticos, ne umanitàrios. In finitias sena rispetu perunu pro sa dignidade e pro sos deretos umanos.
«S'Europa e sos guvernos suos no ant petzi fallidu afrontende sa crisi. Ma, cun totu sos ostàculos burocràticos e cun sas cresuras issoro, in prus de su disòrdine rispondende a sos bisòngios umanitàrios de sos disamparados, ant contribuidu a peorare semper prus sas cunditziones de mìgias e mìgias de poberitos. Fèminas, òmines e mescamente pipios giai dèbiles e afrigidos pro su caminu in pessu fatu, chi no ant agatadu in Europa perunu profetu e perunu amparu balente cunforma a sos bisòngios issoro», at decraradu Brice de le Vingne, diretore de sas operatziones de Mèigos sena làcanas.
Su documentu, tituladu Cursa a ostàculos conca a s'Europa, mustrat sas cunsighèntzias umanitàrias de totu sos disinnos europeos in contu de immigratzione. Dimustrat comente sas polìticas de deterrèntzia, de iscramentu, de assustu apant custrintu siat sos mèigos, siat fintzas àteras organizatziones non guvernativas, a crèschere, afortinde·la die cun die, s'atividade giai dificultosa issoro. In cada giassu de intrada pro s'Europa. In cada làcana. In cada puntu in ue apant ammaniadu tzentros de identificatzione. Semper in prima lìnia. Bortas meda sena bi reventire però, a parare fronte a su disacatu.
