 |
| Deretos lìberos, Url imàgine |
Istradas chi iscurrent lìberas, un'organizatzione turìstica e alberghiera efitziente, bisuras meravigiosas cun logos ùnicos in su mundu. Custos tres elementos permitint a sa Namìbia de èssere unu de sos paisos africanos prus seguros a livellu turìsticu.
Su Namib est su desertu prus antigu de su mundu e li dat su nùmene a su paisu. Medas sunt sos rinotzerontes, sos elefantes, sos leones e sas girafas, sos matessi chi bidimus in sos documentàrios. Sas dunas de su Namib Naukluft Park sunt connotas in totu su mundu gràtzias a sos colores chi mudant in cada momentu de sa die, dae s'arbèschida a s'iscurigada. Sos fotògrafos no isetant àteru.
S'àteru parcu natzionale, su Skeleton Coast National Park, est a ovest e si nche ghetat a s'Otzèanu Atlànticu. Su paesàgiu paret lunare cun una frina costante chi carignat sos relitos de sas naes mesu imbèrghidas dae sa rena. Inoghe bi naschet e bi creschet sa Welwitschia Miràbilis, una pranta chi podet bìvere fintzas duamìgia annos. Sas bèstias e sos vegetales non sunt sos ùnicos a catzigare sas terras de custu parcu, difatis in su ladus setentrionale b'istant sos Himba, una tribù chi impreat ancora sa cultura e sas traditziones antigas.
A sud sa regione de su Gibeon est sa prus famada ca in sa preistòria si nch'at istrampadu unu meteorite, a pàrrere de unos cantos sientziados, su prus mannu chi nche siat rutu dae su chelu. A fùrriu si podent ancora bìdere totu sos bìculos chi bi sunt abarrados. In antis, sas populatziones antigas nche colliant custu materiale pro fraigare ainas de catza, puntales de fritzas, gurteddos e cosas gasi. Sa capitale de s'istadu, Windhoek, si connoschet dereta, tenet ancora paritzas istruturas chi ammentant su perìodu coloniale tedescu, cumintzende dae sa crèsia luterana, fraigada cun s'arenària locale.
Sa natura resesset a donare cale si siat allèriu ispetaculare a chie at sa gana de visitare custu logu, dae su lagu salidu Etosha Pan, mannu ses mìgia chilòmetros cuadrados, a su lagu de suta de terra Dragon's Breath, su prus mannu de su praneta. Sena nch'ismentigare sos istrampos de 37 metros, si narant Epupa Falls e sunt in mesu a unu padente fluviale in ue si nche confundent sa figu areste, su bàobab e sas parmas Makalani.
