 |
| Joe Strummer in unu murale de Noa York. Deretos lìberos. Url imàgine |
Aiat feti chimbanta
annos cando, su 22 de su mese de idas de su 2002, su coro suo si firmeit
de su totu. John Graham Mellor non fiat unu musitzista ebbia. Antis, a
comintzu non pensaiat chi issu etotu ddu podiat devènnere. «Pensaia chi petzi is chi teniant poderios mannos poderent sonare».
Non si permitiat, duncas, de s'acostiare a Pete Townsend, a Chuck
Berry, a Eddie Cochran, a Woody Guthrie. Ma una bia pigada in manos sa
chiterra (e s'apoèrgiu Woody, in onore a chie cun sa chiterra "moriat"
fascistas), su pitzocu nàschidu in Turchia e pàschidu peri su mundu,
comintzeit a sestare sa personalidade sua. Finas a devènnere Joe
Strummer, Joe s'istraulleri.
«Mi diat pràghere a
pensare chi sa gente potzat mudare totu su chi bolet. Est a nàrrere
cale si siat cosa in su mundu. Ammustra·mi cale si siat paisu...e in cue
ddoe at a àere pessones chirchende de nche giùghere a tesu s'umanidade
issoro. Sena cussa gente ses su nudda». Custu naraiat Joe, ca su
tempus venidore - pro issu - non fiat galu iscritu. Issu, cun sa
Telecaster niedda sua e cun is cumpàngios suos (Clash e Mescaleros in
antis de totu), at iscritu sceti cantzones ammesturende punk, reggae,
rock'n'roll e poesia meda, poesia proletària. Ma su venidore, a chitzo o
a tardu, sa gente sua dd'at a iscrìere. E sa colunna sonora est
seberada.
