de Màuru Piredda
 |
| Sarkozy e Hollande. Deretos lìberos.Url imàgine |
Finamentas eris is frantzesos ant votatu
contra a Le Pen. Fiat acontèssidu sa prima bia in is presidentziales de
su 2002, cando su patriarca de famìlia, Jean Marie, colende·nche a
Lionel Jospin, nche crompeit a su ballotàgiu in pare cun Jacques
Chirac. Petzi Arlette Laguillere de Lutte ouvrière, intre is candidados
de su primu turnu, aiat naradu chi non si podiat seberare «intre sa peste e su colera».
Eris, segundu turnu de is amministrativas, est acontèssida pagu prus o
mancu sa matessi cosa. Cun is sotzialistas chi ant dadu inditu a
sustènnere sa dereta sarkoziana in ue non fiant arribados segundos.
Còrsica a banda, su resurtu est custu: sete regiones a sa dereta e
chimbe a sa manca guvernativa.
Cunforma a is amministrativas
coladas, duncas, est su partidu de Hollande chi marcat sa derrota. In su
2010, cando is dipartimentos eletorales regionales fiant 22, is
sotzialistas nde conchisteint 20 tinghende a ruju belle totu sa Frantza
continentale e sa Còrsica. De prus, su paragone intre una Frantza cun 22
regiones eletorales e una cun 13 serbit pro un'àteru meledu. A su chi
nos contat Pierre Bretau, de su giornale Le Monde, «si no aeremus
àpidu sa fusione cun is Pireneos mesanos su Fronte natzionale diat àere
conchistadu sa Languedoc-Roussillon cun Louis Aliot».
Pro
unos cantos analistas, su sèberu sotzialista est istrumentale cunforma a
is presidentziales imbenientes (is de su 2017). Beru chi su partidu de
sa rosa in su pùngiu no at a èssere rapresentadu in is regiones lassadas
a is òmines de Sarkozy. Ma est finamentas beru chi Hollande s'at a
pòdere presentare comente s'òmine de sa natzione, su babbu de s'istadu
de emergèntzia in antis e de su “barrage” anti Le Pen a pustis. Semper
chi su predetzessore suo non ddi chèrgiat parare su pee. In s'ìnteri su
tempus nch'at a colare e Le Pen dd'at a impreare pro s'arguire a su
ballotàgiu chi prus li tirat, su chi est conca a s'Eliseu.
