Su sìndigu de Bastia, Gilles Simeoni, at bìnchidu su segundu turnu de sas eletziones regionales in Còrsica. Sa lista Pè a Còrsica at pigadu su 35,34%, assegurende·si 24 sègios in su parlamentu corsicanu. Sos àteros 27 sègios: sa lista de Paul Giacobbi, Prima a Corsica, de tzentru manca, at pigadu su 28,49% e 12 sègios; su tzentru dereta de José Rossi cun sa lista Le Rassemblement at pigadu su 27,07% e 11 sègios; a coa abarrat sa dereta natzionalista frantzesa, su Front National de Le Pen, ghiadu dae Christophe Canioni, cun su 9,09% e 4 sègios.
Sa noa de sos resurtados definitivos est arribada pagu prus o mancu a
sas 22:00 de eris, aberende unu venidore nou pro sa Còrsica intrea. Sa
gente nch'at prenadu deretu sas pratzas e sas carreras de Aiàcciu,
Bastia, Corte e Borgu, a su cantu de Diu vi salvi regina, s'innu natzionale de s'ìsula.
In sos micròfonos de s'emitente radiofònica locale, Alta Frequenza, at faeddadu sa candidada de Pè a Còrsica Nadine Nivaggioni, narende chi - “Est
una vitòria pro totu sos chi ant gherradu fintzas a oe, pensamus a totu
sos corsicanos e lis torramus gràtzias pro nos àere agiuadu a bìnchere – agiunghende – Pro
seguru est una rivolutzione. Unu mese a oe nemos bi creiat, como
imbetzes sos natzionalistas corsicanos nche sunt in intro de su guvernu e
bos asseguro chi amus a traballare a amus a mudare sas cosas”.
Sas
listas chi punnant a s'auto-determinatzione de su pòpulu corsicanu sunt
crèschidas annu cun annu. In su 2004, 2010 e 2015 sos sègios a
disponimentu de sos indipendentistas nche sunt colados dae 8 a 15,
fintzas a sos 24 de oe.
Àteru datu de importu est su de
s'astensione. In Còrsica ant registradu sa pertzentuale prus bassa de
totu s'istadu, 32,97%, contra a una mèdia frantzesa de pagu prus o mancu
su 41%.
