 |
| Deretos Msf. Url imàgine |
Nch'at coladu pagu prus de unu mese dae cando s'aviatzione americana at
atacadu dae chelu un'ospidale de s'organizatzione umanitària Mèigos sena
fronteras, in Kunduz, Afghanistan. A intèndere su chi narat Cristopher
Stokes, diretore generale de Msf «ant atacadu pro ochiere e
distrùere, ma no ischimus su proite. No ischimus ite ddoe at àpidu in sa
cabina de pilotàgiu e nemmancu ite ddoe at àpidu intre sa cadena de
cumandu americana e s'afghana».
Su documentu de Msf nos contat de
patzientes brusiende in su letu issoro e de personale mèigu fertu dae is
aèreos nointamen chi fiant fuende·si·nche dae s'ospidale tramudadu in
inferru. Peruna resone, duncas, pro bombardare sa zona, ca non ddoe aiat
cumbatas e nemmancu talebanos. «Amus respetadu is acordos – at annantu sa mèiga Joanne Liu –, a
inoghe de armas non bi nd'at intradu ca su personale ospidaleri ddas
controllaiat is istruturas nostras in antis e durante is atacos».
Intre is 105 patzientes ddoe aiat fertos de ambas bandas e finamentas fèminas e pipios. Stokes at mentovadu «unos
cantos resocontos pùblicos chi parent giustifichende s'atacu a dae chi
fìamus curende talebanos, ma pro su deretu internatzionale is
cumbatentes fertos sunt petzi patzientes, non devent retzire atacos e
cherent curados sena discriminatziones».
S'ospidale est istadu
bombardadu su 3 de santugaine, sa matessi die chi sunt comintzadas is
esertzitatziones de sa Nato in is istados portughesu, ispanniolu e
italianu. Msf, a diferèntzia de àteras Ong no aiat dadu s'adesione sua a
sa “Trident juncture 2015”. Chi nche siat inoghe sa cajone? A nos ddu
podimus pregontare?
