Custa borta paret chi bi semus, duos gol fatos e mancu unu subidu.
Tzertu, sos atacantes no ant marcadu, ma b'at pensadu àtere. Su
tzentrucampu est istàbile e agiuat meda sa defensa chi si podet
permìtere fintzas de si fàghere a bìdere in sos tretos de Vigorito.
Cumintzat
allegra sa partida, a un'ala e a s'àtera sas iscuadras si dant ite
fàghere, ma forsis su Casteddu at carchi cosa in prus. Sos tiros in
porta de Pisacane, Farias e Brissa sunt indiritzados male e sos
portieris lis torrant gràtzias. A su de 26 minutos però su puntègiu si
nch'isblocat. Murru dae su ladus de manca faghet unu passàgiu traessu in
mesu a s'àrea e Ceppitelli, brinchende·nche prus in artu de totus, cun
sa conca intzertat su primu gol.
Su Vicenza non reagit e Di Gennaro
proat a aumentare su vantàgiu cun unu bete de tiru dae a tesu, chi però
nch'essit a foras de unu parmu. Sas emotziones finas a como sunt
bastantes pro decrarare s'acabbu de su primu tempus. In su segundu, sos
biancu-rujos de Marino, peleant pro nche la paregiare, ma oe
sos òmines de Rastelli non cuntzedent nudda. Su tiru de Urso
nch'iscudet a sos cartellones publitzitàrios, gasi comente su de Joao
Pedro a pagos metros dae sa porta aversària. Urso est torra su
protagonista de unu bellu tiru dae trinta metros, ma Storari cun agigu
de dificultade bi resesset a nche lu respìnghere.
Sa segunda rete de sos
casteddajos arribat in sos ùrtimos minutos. Unu bellu tiru lìberu de Di
Gennaro nche serrat sa partida. Unu mìssile dae 25 metros cun s'internu
mànchinu de su pee si nch'incàssiat suta de sa rugradura de sos palos.
Carchi neghe la tenet Vigorito chi s'est mòvidu agigu in ritardu. Pro
sos sardos est festa ca nche torrant a su primu postu de sa classìfica
in pare cun su Cesena. Sàbadu arribat su Mòdena, ma non diat dèvere
èssere unu problema.
Formatziones
Casteddu:
Storari, Murru, Krajnc, Ceppitelli, Pisacane, Fossati, Di Gennaro,
Dessena, Melchiorri (77' Cerri), Farias (65' Joao Pedro), Giannetti (70'
Tello).
Allenadore: Màssimo Rastelli
Vicenza:
Vigorito, D'Elia (85' Pettinari), Mantovani, Sampirisi, Laverone,
Cinelli, Urso, Sbrissa (75' Vita), Giacomelli, Ràicevic, Galano (77'
Gatto).
Allenadore: Pasquale Marino
Gol: 26' Pisacane, 89' Di Gennaro
