 |
| Deretos lìberos. Url imàgine |
Una chirca de s'Universidade de Pittsburgh, publicada in su Journal of Clinical Endocrinology and Metabolism,
at istabilidu chi, pesende·si·nche a tardu dae su letu, a coa de chida,
creschent sos arriscos de isvilupare su diabete e sas maladias
cardìacas. Difatis, fintzas sos cambiamentos prus moderados, comente su
fatu de si nche pesare prus a tardu cunforma a su restu de sa chida,
podent ingendrare problemas de salude.
S'ischiat giai chi sos chi
faghent sos turnos in su traballu ant una cunditzione de salude peus, ca
mudant die cun die su sistema tzircadianu issoro, su rellògiu naturale
de su corpus. S'istùdiu at analizadu sos modellos de sonnu de 447 òmines
e fèminas intre sos 30 e sos 54 annos chi ant traballadu nessi 25 oras a
sa chida in foras dae domo.
Sos chircadores ant controlladu sos ritmos
issoro cun unu bratzaleddu eletrònicu, unu traste impreadu pro medire su
sonnu e sos movimentos in sas 24 oras de cada die pro una chida intrea.
B'at essidu a pìgiu chi, sos sugetos de s'esperimentu ant àpidu
variatziones evidentes intre sas dies lìberas e sas dies de traballu.
Sas pessones cun su diferentziale prus marcadu ant fatu registrare:
livellos prus artos de grassu in su sàmbene, livellos artos de insulina a
istòmagu bòidu, tzircunferèntzia de su chintu prus manna e un'ìnditze
de massa corpòrea prus artu.
“Custu est su primu istùdiu chi
nos ammustrat chi sa disritmia sotziale podet cajonare problemas a su
metabolismu fintzas in sos traballadores sanos – at naradu s'autora de sa chirca Patricia Wong, agiunghende chi – custos problemas metabòlicos podent isvilupare obesidade, diabete e maladias cardiovascolares”.
