de Maurìtziu Sale
 |
| Deretos lìberos. Url Imàgine |
S'Assessore regionale de s'Agricoltura,
Elisabetta Falchi, at aprovadu e disciplinadu cun decretu sa pisca de
s'eritzone marinu (Paracentrotus lividus) pro s'istajone
2015/2016. Su documentu, in ue sunt prevìdidos e normados totu sos
cumportamentos de sighire e sos de evitare, in pare cun sas santziones,
est su Decretu N. 2423/DecA/49 de su 15 de Santugaine de su 2015.
Sa pisca at a èssere cunsentida:
a)
a sos piscadores marìtimos professionales, chi nche siant marcados in
su registru de sos piscadores marìtimos, petzi dae sa barca cun s'impreu
de s'asta de agantzu e sa cannuga, (genia de caratza a forma de
imbudu, fata in materiale plàsticu cun unu bidru in s'estremidade chi
permitit de nche lùghere a su fundu de su mare nda), istrumentos
autorizados in sa litzèntzia issoro e finas cun s'ausìliu de su copo (genia de cofinu de rete a màllia modde collegadu a unu bàculu pro lu pòdere manigiare nda);
b)
a sos piscadores professionales subàcueos, chi tèngiant
s'autorizatzione pro sa pisca subàcuea professionale. Podent piscare
siat in apnea, siat cun s'impreu de sas bòmbolas de ossìgenu, ma petzi a
manos o impreende cale si siat istrumentu curtzu chi potzat agiudare a
nch'istacare s'eritzone dae su fundu de su mare;
c) cada
sugetu chi pràtichet sa pisca isportiva o de recreu, in apnea - sena
s'impreu de respiradores a ossìgenu - e petzi a manos sena perunu agiudu
mecànicu.
Su perìodu de pisca - comente est istabilidu in su
decretu - movet dae prima die de Santandria de su 2015 finas a su 10 de
Abrile de su 2016. Sa chirca de sos esemplares de eritzone e totu sas
operatziones chi pertocant su prelevamentu e s'isbarcu de su piscadu,
sunt cunsentidas cada die, ma petzi dae s'arbèschida finas a sas 3 de
borta de die.
Documentos originales Ras:
http://www.regione.sardegna.it/documenti/1_22_20151019173801.pdf
http://www.regione.sardegna.it/documenti/1_22_20151019173853.pdf
