Pàrrere de Maurìtziu Sale
 |
| Deretos REUTERS/ Dado Ruvic. Url imàgine |
Tsipras, in coro suo, at otentu unu resurtadu dòpiu: a nch'isulare sos estremistas a un'ala e - a s'àtera - a torrare a aunire sa Grètzia a in tundu de un'impinnu comunu pro nch'essire dae sa crisi. Sa mèngua de sas agevolatziones fiscales pro sas ìsulas leat conca a una mèngua de sos privilègios pro unas cantas categorias, sighende s'inditu - istimadu e carignadu meda dae Syriza - de sa rechinta colletiva. Su pirispone difusu, pro un'aumentu de s'Iva in sas ìsulas, però mi paret agigu esageradu.
Istùdios reghentes - in
contu de aumentu Iva - in Ispànnia, ant dimustradu, pro nàrrere, chi
s'impatu cun su flussu turìsticu est istadu mìnimu. Sa gente sighit a
biagiare e a gastare. Finas in Ispànnia. A ite? Ca s'intendet prus rica?
Non mi paret. At a èssere a cajone de s'efetu positivu - subra de sa
gente - chi orìginat dae unu megioru de sos controllos fiscales, dae una
giustìtzia fiscale prus ecuànime o dae unu sentidu “pro-operaju” in
crèschida? Progetos normativos anti-corrutzione e anti-evasione bi nd'at
pagu prus o mancu in totue oe in die, ma baddu si bi nd'at a àere a
favore de s'operaju.
Deo non nde bido. O at a dipèndere - pro nàrrere -
dae una cunfiàntzia internatzionale rennoada in sa possibilidade, si non
de nche derrùere, a su nessi de limitare su podere illacanadu de sa
finàntzia a vantàgiu de s’impresa reale? Podet èssere. Semper e cando -
Iva o no Iva - no isco in coro de Tsipras pro su chi pertocat sa
Grètzia, ma in coro meu s'assentu positivu generale - europeu e mundiale
- est dèvidu a sa segura a sa torrada in ponte de su sentidu
internatzionale de manca, pagu prus o mancu in totu su mundu
otzidentale. E cun su sentidu - giai s'ischit - creschent finas su
rispetu e sa cunfiàntzia chi cadaunu diat dèvere àere pro perisse e pro
sas ideas suas. E duncas creschent finas s'atza e s'atrivìngiu. E sa
gana de torrare a sa luta.
Pensamentos a s'isfaddida? A bìdere istemus.
