 |
| Deretos MSF/AFP/Getty Images |
«A dae chi ddoe est su suspetu chi siat istadu cummìtidu unu
crìmine de gherra, sa rechesta de Msf est pro un'indàgine funduda,
crara e cumprida subra de s'acontèssida, e chi a si nd'ocupare siat
un'ente internatzionale indipendente. A pigare in cunsideru petzi
un'indàgine interna de una parte de su cunflitu non diat èssere cosa
bastante».Custas is paràulas de Christopher Stokes, diretore
generale de s'ong Mèigos sena fronteras, a pustis de is bombardamentos
americanos chi, in is primas oras de su 3 de ladàmine, ant interessadu
s'ospidale de Kunduz (Afghanistan) ferende a morte 12 operadores e 10
degentes (tres fiant pitzinnos).
Dae tando s'ospidale at sessadu s'atividade sua, custringhende mèigos e malàidos a si nche mòvere a aterue. No est mancadu s'agiudu de Emergency.
«S'ospidale de Kabul est prenu - at naradu unu coordinadore de s'iscuadra de Gino Strada ativu in Afghanistan -, pro cussu amus postu sete letos in s'àula de inglesu e 10 in sa lavanderia. In s'ìnteri, pro ofèrrere prus seguràntzia e amparu, amus fatu iscrìere "Emergency hospital" a maduru in sa cobertura de su blocu operatòriu nou».
S'ospidale Msf de Kunduz, dae cando sunt comintzados is
cumbatimentos (lunis coladu), aiat aumentadu sa capatzidade sua cun 150
letos. 394 is pessones curadas (de cale si siat banda) gràtzias a unu
traballu sena pasu, die e note. Msf òperat in Afghanistan dae su 1980.
