 |
| Passos Coelho. Deretos publico.pt |
Una chida a pustis de is eletziones catalanas, un'àteru pòpulu ibèricu
est andadu a votare. O mègius, pagu prus de sa metade, a dae chi su 43%
de is eletores at disinnadu de si nch'abarrare in domo. A banda de totu
custu, su Portogallu, unu de is paisos Piigs, at a sighire a èssere
ghiadu dae su primu ministru Pedro Passos Coelho (sotzialdemocràticu de
tzentru dereta) nointames una legisladura in pessu colada cundida cun
"làgrimas e sàmbene". Ma comente at a guvernare sa coalitzione fraigada a
inghìriu de su Psd sena èssere cròmpida a sa majoria assoluta?
99
sègios (su 37%) non sunt bastantes: Portugal à frente nde deviat
otènnere 116 ma, cunforma a is eletziones de su 2011, at regortu 746.007
votos in mancu de su Psd e de su Partidu populare (chi tando fiant
partzidos in duas listas). Su Partidu sotzialista de Antonio Costa
(sotzialdemocràticu a beru) cun 1.740.300 votos (172.132 in prus de su
2011) at a ocupare imbetzes 85 cadreas (fiant 74). Est capatze chi is
sotzialistas, favorèvoles a un'austeridade agigu prus modde, potzant
sustènnere (astenende·si) unu guvernu ghiadu dae sa coalitzione de
Passos Coelho in càmbiu de carchi cuntzessione. Pighende in cunsideru is
19 sègios conchistados dae su Bloco de esquerda (dae su 5,17 a su 18%) e
is 17 de sa coalitzione comunista-birde (chi nde teniat 16), si diat
dèvere àere una majoria de manca pro guvernare. Ma is diferèntzias intre
sotzialistas e manca radicale sunt mannas a beru. Su Bloco (serente a
Syriza, Podemos, Sinn Fein e Rifondazione) bolet torrare a negotziare su
dèpidu; sa Cdu sa essida dae s'èuro. «O desafio comenca agora», tìtulat Diario de Noticias. Amus a bìdere.
